Израелскиот опозициски лидер го критикуваше Нетанјаху за поддршката на прекинот на огнот меѓу САД и Иран

Лидерот на израелската опозиција, Јаир Лапид, денес упати остри критики до премиерот Бенјамин Нетанјаху поради поддршката на привремениот прекин на огнот меѓу Соединетите Американски Држави (САД) и Иран, нарекувајќи го потегот „политички и стратегиски неуспех“, пренесува Анадолу.

„Никогаш во нашата историја не сме виделе ваква политичка катастрофа. Израел не беше ниту присутен кога се носеа одлуките за суштината на нашата национална безбедност“, напиша Лапид на американската компанија за социјални медиуми Х.

Тој додаде дека ќе бидат потребни години за да се поправи „политичката и стратегиската штета предизвикана од Нетанјаху поради неговата ароганција, небрежност и недостиг на стратегиско планирање“.

Лапид истакна дека додека армијата и јавноста ги исполниле своите улоги, Владата не успеала да ги оствари своите цели.

„Армијата изврши сè што беше побарано од неа, а народот покажа извонредна издржливост, но Нетанјаху потфрли политички и стратегиски и не постигна ниедна од целите што си ги постави“, рече тој.

Неговите коментари следуваат откако Кабинетот на Нетанјаху соопшти дека Израел ја поддржува одлуката на американскиот претседател Доналд Трамп за запирање на воените напади врз Иран во период од две недели.

Сепак, од Кабинетот на Нетанјаху нагласија дека двонеделниот прекин на огнот „не го вклучува Либан“.

Претседателот на САД, Доналд Трамп, вчера објави дека се согласил „да ги прекине бомбардирањата и нападите врз Иран во период од две недели“.