Израелскиот Кабинет за безбедност „тајно“ одобри изградба на 34 нелегални населби на окупираниот Западен Брег

Израелскиот Кабинет за безбедност „тајно“ одобри изградба на 34 нелегални населби на окупираниот Западен Брег за време на неодамнешната седница, објавија денес израелските медиуми, пренесува Анадолу.

Канал 24 не го прецизираше точниот датум на одлуката, но наведе дека била донесена за време на американско-израелската воена кампања против Иран, која започна на 28 февруари.

„Кабинетот за безбедност тајно одобри изградба на 34 нови населби на Западниот Брег, што е рекорден број усвоен во еден потег за време на кампањата против Иран“, објави каналот, а исто така извести и за тоа дека меѓу одобрените локации се места во палестинските населби на северниот дел на Западниот Брег и оддалечени области до кои израелските сили ретко може да стигнат.

„Ова е најголем број населби што некогаш се одобрени на една седница на Кабинетот“, додава Канал 24.

Се наведува дека вкупниот број нелегални населби одобрени од Владата на премиерот Бенјамин Нетанјаху откако дојде на власт кон крајот на 2022 година се зголемил на 103.

Според јавниот сервис, началникот на Генералштабот на Израел, генерал-полковник Ејал Замир, присуствувал на состанокот и не се спротивставил на одлуката.

Сепак, изразил загриженост поради ограничениот број луѓе и побарал процена за спроведување на одлуката во повеќе области истовремено.

Кабинетот, исто така, избрал да ја задржи одлуката во тајност за да го избегне притисокот од САД за време на тековната војна против Иран, со оглед на тоа што претседателот Доналд Трамп јавно се спротивстави на израелската анексија на Западниот Брег, објави каналот.

Засега нема коментар од израелската Влада во врска со ова известување.

Меѓународната заедница и Обединетите нации го сметаат Западниот Брег, вклучително и Источен Ерусалим, за окупирана палестинска територија и израелските активности за населување таму ги сметаат како „нелегални“ според меѓународното право.

Околу 750.000 израелски доселеници живеат во 141 илегална населба и 224 пункта низ Западниот Брег, вклучително и 250.000 луѓе во 15 нелегални населби во Источен Ерусалим.

Последниве години израелските сили и доселениците ги интензивираа операциите низ Западниот Брег, вклучително и во Источен Ерусалим, вклучувајќи приведувања, убиства, уништување имот и раселување на Палестинците, заедно со континуираното проширување на нелегалните населби.

Палестинските претставници предупредуваат дека ваквите акции би можеле да му го отворат патот на Израел формално да го анектира Западниот Брег, со што ефикасно ќе се стави крај на шансите за формирање палестинска држава предвидени во резолуциите на ОН.

Меѓународниот суд на правдата во јули 2024 година ја прогласи израелската окупација на палестинската територија за нелегална и повика на евакуација на сите населби на Западниот Брег и Источен Ерусалим.