Водачите на ЕУ ги поддржуваат новите планови за одбранбени трошоци за да ја зајакнат безбедноста

Лидерите на Европската Унија се согласија за новите планови за трошоците во одбраната по вонредните разговори што се одржаа денеска во Брисел, известува Анадолу.

Лидерите на 27-те земји членки поддржаа низа заклучоци насочени кон зајакнување на воената автономија и подготвеноста на ЕУ во соочувањето со глобалните предизвици.

Усвојувањето на заклучокот за поддршка на Украина го блокираше унгарскиот премиер Виктор Орбан и тој дел ќе биде објавен како посебен анекс, со поддршка од 26 земји членки.

Лидерите на ЕУ изразија потреба Европа да стане посуверена во заштитата на своите граници и заштитата на своите граѓани.

„Европскиот совет нагласи дека Европа мора да стане посуверена, поодговорна за сопствената одбрана и подобро опремена да дејствува и самостојно да се справува со сегашните и идните предизвици и закани со пристап од 360 степени“, се вели во соопштението.

„Агресорската војна на Русија против Украина и нејзините реперкусии по европската и глобалната безбедност во променливо опкружување претставуваат егзистенцијален предизвик за ЕУ“, се додава во соопштението.

Новите планови за одбрана се фокусирани на забрзување на мобилизацијата на потребните инструменти, вклучително и 150 милијарди евра нови заеми и финансирање за зајакнување на безбедносната рамка на Унијата.

Претставниците на ЕУ истакнаа дека овие чекори се клучни за одржување на стабилноста во регионот, со оглед на сѐ покомплексниот геополитички пејзаж.