Merve Berker
28 Ноември 2024•Ажурирај: 28 Ноември 2024
Фосилизираните дигестивни остатоци откриваат нови перспективи за тоа како диносаурусите доминирале на Земјата, се вели во едно истражување, јавува Анадолу.
Истражувањето, објавено во „Нејчр“, испитуваше над 500 примероци на фосилизиран дигестивен материјал, означен како бромалити, од полскиот басен, нагласувајќи како овие праисториски суштества се приспособувале на екосистемите во развој пред милиони години.
„Нашето истражување покажува дека можете да користите навидум незабележителни фосили за да добиете извонредни резултати“, рече коавторот Мартин Кварнстром од Универзитетот во Упсала, Шведска, а беше цитиран од „Нејчр“.
Користејќи напредни методи како синхронотронска микротомографија, научниците ги анализираа бромалитите, за кои се верува дека се стари 200 милиони години.
Оваа техника им овозможила да откријат траги од риби, растенија и инсекти, а некои примероци биле извонредно сочувани.
„Некои инсекти беа недопрени, со нозете и антените целосно видливи“, забележа Кварнстром.
Наодите открија дека исхраната на диносаурусите станала сѐ повеќе разновидна со текот на времето, бидејќи поголемите видови со различни навики за хранење почнале да доминираат во доцниот тријаски период, што укажува на тоа дека приспособливоста била клучен фактор за нивниот еволутивен успех.
Дополнително, истражувањето ги поврза овие адаптации на исхраната со трансформациите на животната средина.
Зголемувањето на влажноста предизвикано од климата ја промени вегетацијата, а диносаурусите покажале супериорна приспособливост во нивните навики за хранење во споредба со другите копнени суштества.
„Подемот на диносаурусите беше долг, сложен процес обликуван од случајност и адаптација“, објасни Кварнстром.
Според „Нејчр“, палеонтологот Суреш Синг од Универзитетот во Бристол го пофалил истражувањето како „импресивна работа“, нагласувајќи ја нејзината вредност во разбирањето како животот се развива како одговор на еколошките предизвици, вклучително и климатските промени.
Тој, исто така, предложи да се прошири истражувањето за да се истражат регионалните разлики во еволуцијата на диносаурусите, особено во јужната хемисфера, според списанието.
Ова пионерско истражување ја нагласува сложената поврзаност помеѓу промените во животната средина и приспособливоста во обликувањето на еволутивната траекторија на животот на Земјата.
