АГРИ (АА) - АБДУЛА СОЈЛЕМЕЗ -
Под иницијатива на Канцеларијата на гувернерот на областа Догубајазит во Агри, Турција, каде што се смета дека има остатоци од арката на Ное, извршени се геофизички истражувања, јавува Агенција Анадолија (АА).
Илхан Дурупинар, кој во Генералната дирекција за мапирање во 1959 година правеше фотографии од воздух за мапи на регионот, ја откри областа во близина на селото Телчекер на планината Арарат, на која се верува дека има остатоци од арката на Ное.
Со инструкции на гувернерот Осман Варол, во областа која стана честа дестинација за многу домашни и странски туристи секоја година, спроведена е студија за да се истражи големината на одроните што се случија во областа, нивните ефекти врз „патеката на бродот“.
Во тие рамки, тим од 10 лица составен од инженери геофизичари и компјутерски стручњаци извршија геофизички мерења на и околу областа за која се верува дека има „траги од бродот“.
- Работите на теренот се завршени -
Инженерот по геофизика, Озџан Озен, за Агенција Анадолија (AA) изјави дека тие прават истражување за остатоците под областа за која се верува дека постои трага од бродот и дека во регионот за прв пат се спроведува студија под покровителство на државата.
Поради опасноста да се изгуби „трагата на бродот“ како резултат на лизгањето на земјиштето Озен рече дека регионот ќе биде преземен под заштита на Канцеларијата на гувернерот.
„Завршивме дел од теренските и геофизичките студии што ги направивме на и околу силуетата на арката на Ное во областа Догубајазит. Целта на работата што ја направивме таму е да ги откриеме формациите на различни геолошки структури под и околу силуетата на арката на Ное. Ја завршивме студијата со геофизичките технологии и геофизички инженерски практики кои се користат во целиот свет“, рече Озџан Озен.
- Конечните извештаи од студијата ќе бидат доставени до Канцеларијата на гувернерот -
Озен истакна дека е среќен затоа што тој е првиот инженер кој во име на државата извршил геофизички истражувања на теренот, и рече дека резултатите од студијата ќе ги достават до гувернерот на Агри.
Посочувајќи дека постои голем интерес за арката на Ное од целиот свет, Озен додаде:
„Во студиите го користевме и методот георадар (GPR). Го користевме методот GPR за да ги откриеме различните формации во подземјето и различните објекти кои ја нарушуваат хомогеноста на подземјето. Меѓутоа, бидејќи регионот е зона на свлечиште, ние исто така го користевме методот на 3D томографија со електрична отпорност (ERT) за да ги откриеме оштетувањата и димензиите на силуетата предизвикани од тековите и лизгањата околу силуетата. Овие студии на терен ги завршивме за околу 10 дена. Сега сме во фаза на обработка на податоци. Во фазата на обработка на податоците имаме за цел да ги обработиме податоците што ги добиваме на терен со напредни програми. Со 2Д и 3Д слики од подземјето во тој регион, имаме за цел да откриеме различни остатоци.“
