Половина од Французите избегнуваат да одат на лекар

ПАРИЗ (АА) - Половина од Французите, плашејќи се од она што би можеле да го чујат, избегнуваат да одат на лекар, пренесува Anadolu Agency (AA).

Според истражувањето што го спроведе агенцијата „BVA“ (БВА), 78 отсто од Французите кои учествувале во анкетата изјавиле дека во претходните посети на ординациите, при прегледите се чувствувале непријатно поради некои осуди од страна на лекарите.

Педесет отсто од анкетираните изјавиле дека го одложуваат одењето на лекар бидејќи се плашат од она што би можеле да го чујат. Процентот на жени што го избегнуваат одењето на лекар од истите причини достигнува до 83 отсто.

Според истражувањето, поради слични причини, 38 отсто од Французите ги откажуваат своите закажани средби со лекар, додека 25 отсто престанале да одат на лекар.

Истражувањето покажа дека пациентите најмногу се жалат на фактот што лекарите немаат внимателен пристап кон нив и се плашат од несоодветни лекарски совети.