САРАЕВО (АА) - Во добронамерен гест, 91-годишна жителка на Босна и Херцеговина, која е примател на социјална помош, донираше за жртвите од земјотресите кои на 6 февруари ја потресоа јужна Туркије, јавува Анадолу.
Милка Гребенар, жителка на главниот град на Босна и Херцеговина, Сараево, живее од пензија и дневна помош во храна од локална хуманитарна организација.
Но, кога дознала за катастрофата во Туркије, која ужива историски и културни односи со оваа балканска земја, 91-годишната жена решила да донира 5 евра, последниот дел од нејзината преостаната скудна февруарска пензија, преку лицето кое ѝ ја носи храната секој ден.
Гребенар, која живее сама откако го загуби сопругот пред неколку години, рече дека сака да ја подели својата пензија со некој на кого му е потребна.
„Беше страшно да се гледаат погодените подрачја од земјотресот и тоа многу ме погоди. Тоа е целосна катастрофа“, изјави таа за Анадолу, додавајќи дека дури и малите количини можат да направат голема разлика.
Гребенар, исто така, ги донираше играчките што ги собирала во текот на годините за децата кои преживеаја во смртоносните земјотреси.
„Кога видов дека се собираат играчки за жртвите од земјотресот, отидов во задната соба и собрав сè што имав. Ги ставив играчките на маса, гледав долго и решив да ги донирам и нив. Јас сум многу среќна. Некој ќе си игра со овие играчки“, рече таа.
Коментирајќи ги напорите на турскиот претседател Реџеп Таип Ердоган за регионот погоден од земјотресот и неговиот народ, таа рече: „Имам добро мислење за него затоа што ги слушам неговите изјави и гледам колку тој го штити својот народ.“
Повеќе од 45.000 луѓе загинаа во земјотресите со јачина од 7,7 и 7,6 степени според Рихтер, со епицентар во турската област Кахраманмараш, кои погодија уште 10 други турски области - Хатај, Адана, Газиантеп, Дијарбакир, Адијаман, Малатија, Килис, Османије, Елазиг и Шанлиурфа.
