Средба Вучиќ-Лајчак: ЕУ очекува Белград и Приштина да имплементираат сѐ што е договорено

БЕЛГРАД (АА) - Претседателот на Република Србија, Александар Вучиќ, денеска во Белград се сретна со специјалниот претставник на ЕУ за дијалог меѓу Белград и Приштина и за други регионални прашања на Западен Балкан, Мирослав Лајчак, на разговори за продолжување на дијалогот Белград - Приштина, особено за Договорот од Брисел, потпишан пред девет години, пренесува Агенција Анадолија (АА).

Кабинетот на српскиот претседател соопшти дека Вучиќ изјавил дека поминале девет години од потпишувањето на Бриселскиот договор и дека сѐ уште нема напредок во спроведувањето на обврските на Приштина, пред сѐ во однос на формирањето на Заедницата на српските општини и додаде дека Србија очекувала дека постигнатите договори се целосно почитувани и имплементирани.

Се додава дека Лајчак изјавил дека ќе продолжи целосно да се ангажира во продолжувањето на дијалогот под покровителство на Европската Унија без дополнително одлагање, додавајќи дека членките на ЕУ очекуваат двете страни да спроведат сѐ што е договорено во процесот на дијалог во последните десет години.

Вучиќ истакна дека Србија ги поддржува активностите, напорите и намерите на Лајчак да се постигне решение преку политика на компромис, без ултиматуми и наметнати решенија, во желба да покаже разбирање за своите државни и национални интереси, а не само за националните интереси на Албанците.

Вучиќ му се заблагодари на Лајчак за неговата посветеност, додавајќи дека тој е секогаш добредојден во Србија.