سلێمانی.. كۆمەكی جەژن بۆ خاوەن پێداویستییە تایبەتەكان

لە رێوڕەسمێكدا بە ئامادەبوونی بەرپرسانی ئیداری شارەكە، لە هۆڵی كۆمەڵەی كورتە باڵاكانی كوردستان لە شاری سلێمانی، نوێنەرانی حەوت رێكخراوی تایبەت بە خاوەن پێداویستییە تایبەتەكان كۆتایهاتنی كەمپێنێكیان راگەیاند بۆ كۆكردنەوەی كۆمەك و هاوكاری جەژن بۆ خاوەن پێداویستییە تایبەتەكان، كەمپینەكە ماوەی شەش رۆژی خایاند و لەو ماوەیەدا داوای هاوكاری و كۆمەك لە هەموو چین و توێژە جیاوازەكان بە تایبەت سەرمایەدارەكان كرا.

سكرتێری رێكخراوی یەكێتی كەمئەندامانی كوردستان سامان حسێن لە كۆنگرەیەكی رۆژنامەوانیدا رایگەیاند: "دوای شەش رۆژ لە بەڕێوەچونی كەمپینەكە بەداخ و نائومێدییەكی زۆرەوە رایدەگەیەینن كە خراپترین و كەمترین كۆمەكمان كۆكردەوە و بێهیوا بوین لەو پارەیەی لە كەمپینەكەدا كۆمان كردەوە".

ئەو نیگەرانی خاوەن پێداویستییە تایبەتەكانی نیشاندا لە بەدەمەوە نەهاتنی سەرمایەدار و بازرگانانی شاری سلێمانی كە بەدەم هەڵمەتەكەیانەوە نەهاتوون.

سامان گوتی: "ئەوەی هاوكارییان كردین تەنها ئەو كەسانە بوون كە چەند ساڵە ناویان دەهێنین، بڕی ئەو پارەیەی كۆبووەتەوە 105 ملیۆن و 50 هەزار دینار بووە، لەو بڕەش تەنها 14 ملیۆن و 721 هەزار دیناری بەر رێكخراوەكان كەوتووە كە بەسەر 50 هەزار خاوەن پێداویستی تایبەتدا لە سنووری پارێزگای سلێمانی دابەش دەكرێت".

ئەو بەرپرسەی یەكێتی كەمئەندامان ئەوەشی گوت: "پێشتر هەستمان دەكرد بەوەی تەنها لەلایەن حكوومەتەوە پەراوێز خراوین، بەڵام ئەمڕۆ هەستمان كرد كە لەلایەن سەرمایەدارەكانیشەوە پەراوێزخراوین و حەز بە بینینمان ناكەن".

لەلای خۆیەوە سەرۆكی رێكخراوی كورتە باڵاكانی كوردستان عومەر كەریم گوتی: "وەك خاوەن پێداویستییە تایبەتەكان رایدەگەیەنین كە نانی جەژن ناكەین و ئۆباڵی ئەوەش دەخەینە سەر بەرپرسانی حكوومەت و سەرمایەدارەكان".

تەرزە محەمەد كچێكی كورتە باڵای تەمەن 19 ساڵانە، ئەو لەبارەی دۆخی خاوەن پێداویستییە تایبەتەكان و كەمپینەكەوە گوتی: "ئەم هەڵمەتە تا رادەیەكی باش سوودی بۆ خاوەن پێداویستییە تایبەتەكان هەیە كە 360 رۆژە هیچ مووچەیەكیان وەرنەگرتووە و هەوڵێكە بۆ دڵخۆش كردنیان".

ئەو ئاماژەی كرد بەوەی، بەهۆی قەیرانی دارایی و دواكەوتنی مووچەكانیانەوە، كەمئەندامان دۆخێكی دارایی خراپیان هەیە و پێویستیان بەهاوكاری هەیە.