"بە تاشینی قژی میهرەبانى بۆ تووشبوانى نەخۆشى شێرپەنجە دەربڕی"

سلێمانى-AA
ڤێنا کەمال تەمەنى 31 ساڵە و هاوسەرگیرى کردووە و خاوەنى دوو منداڵە و لەشارى سلێمانى چالاکوانى بوارى ژنانە و ماوەى چەند ساڵێکیشە کارى رۆژنامەوانى دەکات و لە ئێستاشدا بۆ دەربڕینى هاوخەمى و میهرەبانى بۆ توشبووانى نەخۆشى شێرپەنجە قژى خۆى تاشیووە.
لەو بارەیەوە ڤێنا کەمال بە ئاژانسى ئانادۆڵوى راگەیاند "من کاتێک بڕیارم دا کە تاڵەکانی قژی سەرم ببەخشم و بیتاشم بۆئەوە بوو کە مرۆڤێک دڵ خۆش بکەم و وەک پاڵپشتیەک بۆ نەخۆشانى شێرپەنجە بۆ ئەوانەى کە تاڵەکانى سەریان لەدەست دەدەن".
گوتیشى: "پێویستە کۆمەڵگاى ئێمە هەست بەوە بکات کە ئێمە ببەخشین بەڵام مەرج نییە بە پارە و ماددە ئێمە ببەخشین بەڵکو دەبێت ئێمە بە رۆح ببەخشین کارى مرۆڤانە ئەنجام بدەین بۆئەوەى دڵى نەخۆشان خۆش بکەین".
ناوبراو گوتیشی: "هاورێیەکى خۆم تووشى نەخۆشى شێرپەنجە بووە ئەم هەڵوێستەى منیش وەک وەفایەک بۆ ئەو هاوریێیەشمە تاکو پێى بڵێم هاورێکەم منیش بۆ دڵ خۆشکردنی تۆ سەرى خۆمم تاشیوە وە پێى بڵێم تۆ بە تەنها نیت بەڵکو منیش لەگەڵتم".
ڤێنا ئەوەشى راگەیاند "من بە نەخۆشانى شێرپەنجە دەڵێم هەموو نەخۆشییەک چارەسەرى هەیە نەخۆشى ئێوەش چارەسەرى دەبێت و پێویستیشە زیاتر خزمەت بکرێن و تاکو چارەسەرى تەواو وەربگرن وەک خۆشم زۆر سوپاسى کارمەندانى نەخۆشخانەى هیوا دەکەم لە شارى سلێمانى کە کار دەکەن بۆ چارەسەرکردنى نەخۆشانى شێرپەنجە".
نەخۆشێکى شێرپەنجە لە نەخۆشخانەى هیواى شارى سلێمانى، شەدا زیاد زیاد بۆ ئاژانسى ئانادۆڵو گوتى: "ئەگەر چى من تووشى نەخۆشى شێرپەنجە بووم بەڵام زۆر دڵ خۆشم کە ئەو خاتوونە بە تاشینى قژەکانى هاوخەمى بۆ ئێمەى نەخۆشان دەربریوە".
گوتیشى: "ئەو کارەى ئەو خاتوونە کردوێتى پێویستە رێزى لێ بگیرێت چونکە ئەو کارێکى گەورەى ئەنجام داوە تاکو دڵى ئێمە خۆش ببێت بەوەش ئەو بەئێمە دەڵێت کە لە گەڵتانم ئێوەى نەخۆش هیچ تەنها نین".