یەکگرتووی ئیسلامیی کوردستان نۆیەھەمین کۆنگرەی خۆی دەبەستێت

هەولێر - AA

بڕیارە سبەی ھەینی ٢٧ی کانوونی یەکەمی ٢٠٢٤ یەکگرتووی ئیسلامیی کوردستان نۆیەھەمین کۆنگرەی خۆی لە شاری ھەولێر ببەستێت.

کۆنگرەکە بە بەشداری زیاتر لە ٨٠٠ ئەندام بەڕێوەدەچێت و ماوەی دوو ڕۆژ دەخایەنێت.

ئەمە لە کاتێکدایە کە لەدوای ھەڵبژاردنی خوولی شەشەمی پەرلەمان، یەکگرتووی ئیسلامیی ھەنگاوی بەرەو ئەنجامدانی نۆیەھەمین کۆنگرەی خۆی نا و بۆ ئەم مەبەستەش لە ڕۆژانی ڕابردوودا لەژێر ناونیشانی (بەرەو ئایندەیەکی گەشتر) کۆنفرانسی بازنەکانی ھەولێر، سلێمانی، دھۆک و ھەڵەبجە بەڕێوەچوو.

لەکۆنفرانسەکەدا ئەندامانی ھەڵبژێردراوی سنووری مەڵبەندەکان گفتوگۆ و پێداچوونەوەیان لەسەر ڕەشنووسی پەیڕەو و پڕۆگرامی یەکگرتووی ئیسلامیی کوردستان کرد.

بەپێی پەیڕەوی ناوخۆی یەکگرتووی ئیسلامیی کوردستان، ئەمینداری گشتی ئەو حزبە تەنیا دەتوانێت دوو خول خۆی بۆ ئەم پۆستە کاندید بکات و بەم پێیەش، ئەگەر پەیڕەوی ناوخۆ ھەموار نەکرێتەوە، ئەوا ئەمینداری گشتیی یەکگرتووی ئیسلامیی کوردستان، سەڵاحەدین بەھائەدین ناتوانێت خۆی بۆ ئەم پۆستە کاندید بکاتەوە.

یەکگرتووی ئیسلامیی کوردستان لە شوباتی ١٩٩٤ دەمەزراوە و تا ئێستا ھەشت کۆنگرەی ئەنجامداوە و لە خوولی شەشەمی پەرلەمانیش ٧ کورسی پەرلەمانیی بەدەستھێنا و ئۆپۆزسیۆن بوونی خۆی لە حکوومەتی ھەرێم ڕاگەیاندووە.