یونامی: "داعش هێشتا هەڕەشەیە"

هەولێر - AA

نوێنەرایەتیی نەتەوە یەکگرتووەکان لە عێراق (UNAMI) رایگەیاند، هێرشی چەکدارانی رێکخراوی تیرۆریستی داعش بۆسەر سوپای عێراق لە دیالە ئاگادارکردنەوەی ئازاربەخشە کەوا رێکخراوەکە هێشتا هەڕەشەیە.

یونامی لەبارەی هێرشەکەوە لە هەژماری تایبەتی خۆی ‏لە تۆڕی کۆمەڵایەتی تویتەر پەیامێکی بڵاوکردەوە کە تیایدا هاتووە "هێرشە تیرۆریستیەکەی دیالە کە بووە هۆی گیانلەدەستدان و بریندارکردنی سەربازە عێراقییەکان، ئاگادارکردنەوەی ئازاربەخشە کەوا رێکخراوی داعش هێشتا هەڕەشەیە".

لە بەشێکی دیکەی پەیامەکەدا هاتووە

"وریایی و یەکڕیزیی شکست بەم هەوڵە ترسنۆکانە دەهێنێت کە ئامانجیان تێکدانی سەقامگیرییە".

ئەمڕۆ هەینی، چەکدارانی رێکخراوی تیرۆریستی داعش هێرشیان کردە سه‌ر هێزەکانی سوپای عێراق لە ناحیه‌ی عوزێم سەربە پارێزگای دیالە و له‌ ئاكامدا ئەفسەرێک و ١٠ سەرباز کوژران.