دهۆک - AA
لە رێوڕەسمێکدا لە چیای گارە لە سنووری پارێزگای دھۆک، شەش ورچ لە لایەن رێکخراوی کوردی ئەمریکی ئازاد کران و بۆ بینینی ورچەکان بە سەدان ھاووڵاتیی بەشدارییان لەو رێوڕەسمەدا کرد.
رێوڕەسمەکە لە کەشوھەوایەکی بەفراویدا لە بەرزاییەکانی چیای گارە بەڕێوەچوو، تیایدا ورچەکان نێردراوەنەوە بۆ ناو ژینگە و سرووشت.
شەش ورچەکە کە لەلایەن رێکخراوی کوردی ئەمریکییەوە ھێنرابوون بو چیای گارە، پێنچیان لە پارێزگاکانی بەسرا و ناسڕییە و ئەوەی دیکەیان لە پارێزگای ھەولێرەوە ھێنرابوون کە بەگوتەی رێکخەرانی رێوڕەسمەکە ژمارەیەکیان کڕدراون و ئەوانەی دیکەش بێ بەرامبەر وەرگیراون.
بەرپرسی رێکخراوی کوردی ئەمریکی، بڵند بریفکانی لە رێوڕەسمی ئازادکردنی ورچەکان لە چیای گارە بۆ ئاژانسی ئانادۆڵو دوا و گوتی: "ئەمرۆ شەش ورچمان ئازاد کرد. ئەم ورچانە یاری لەگەڵ مرۆڤ دەکەن و زیانبەخش نین چونکە لەگەڵ مرۆڤدا گەورەبوونە".
بڵند بریفکانی گوتیشی: "ماوەیەکی پێدەچێت تاوەکو ورچەکان لەگەڵ ژینەگەدا رادێن چونکە ئەوان لەگەڵ مرۆڤدا ژیاون، وەک چۆن پێش دوو ساڵ دوو ورچمان ئازاد کرد لە چیای گارە، ئەوکات ورچەکان بۆ ماوەی دوو مانگ لە نێو کۆشکی چیای گارە مانەوە و دواتر لەگەڵ ژینگەدا راهاتن و چوونەوە ناو سرووشت".
لەبارەی هۆکاری ھەڵبژاردنی چیای گارە بو ئازادکردنی ورچەکان، بەرپرسی رێکخراوی کوردی ئەمریکی گوتی: "چیای گارە بەرزترین شوێنی پارێزگای دھۆک و ساردترین شوێنە لە سنووری پارێزگاکەدا و ورچیش حەزی لە کەشوهەوای ساردە، بۆیە چیای گارەمان ھەڵبژارد".
بڵند بریفکانی لەبارەی ئامانجی ئەم کارەیان گوتی: "مەبەستمان جوانکردنی ژینگەیە، بەزیادبوونی ژمارەی ورچەکان خوای یاربێت دوای ١٠ ساڵی دیکە ژمارەیەکی زۆر ورچ لە چیای گارە دەبینرێن".
گورانیبێژی پارێزگای دھۆک، رومی ھەرکی کە بەشداری لە رێوڕەسمەکەدا کردبوو بۆ ئاژانسی ئانادۆڵو گوتی: "ئەمە چالاکییەکی زۆر جیاواز بوو، کاریگەرییەکی زۆر باشی دەبێت بو جوانکردنی سرووشتی پارێزگای دھۆک و راکێشانی گەشتیار بۆ ناوچەکە کە خەڵکی بیانی دێنە ئێرە دەبینن کە چەندە سرووشتێکی جوانمان ھەیە".
ئەمە دووەم جارە کە لە چیای گارە ورچ ئازاد دەکرێن و لە ساڵی ٢٠١٩دا ھەر لەلایەن رێکخراوی کوردی ئەمریکییەوە دوو ورچ ئازاد کرابوون کە دوای ماوەیەک ببوونە چوار ورچ، بۆیە پێشبینی دەکرێت کە بەم چالاکییانە ژمارەی ورچەکان لە چیای گارە زیاد ببێت.
