Heman Husseın Yaseen
05 شوبات 2020•نوێکردنەوە: 06 شوبات 2020
هەولێر - AA
بە ئامادەبوونی سەرۆکی لیژنەی رۆشنبیری و راگەیاندن و پەیوەندییەکان لە پەرلەمانی کوردستان، جێگری پارێزگاری هەولێر، نوێنەری وەزارەتی ناوخۆ و نوێنەری ئاسایشی گشتی، سەندیکای رۆژنامەنووسانی کوردستان راپۆرتی پێشێلکارییەکانی ساڵی رابردووی بەرامبەربە رۆژنامەنووسان بڵاوکردەوە کە تیایدا لە ٦٦ حاڵەتدا، ١٥١ پێشێلکاریی بەرامبەربە رۆژنامەنووسان تۆمارکراوە.
ئەمڕۆ چوارشەممە، سەندیکای رۆژنامەنووسانی کوردستان، راپۆرتی ژمارە ٢٣-٢٤ی پێشێلکارییەکانی ساڵی رابردووی بەرامبەربە رۆژنامەنووسان بڵاوکردەوە.
راپۆڕتەکە لەلایەن سەرۆکی لیژنەی داکۆکیکردن لە ئازادی رۆژنامەنووسی و مافی رۆژنامەنووسان، نەزاکەت حوسێن خوێندرایەوە کە بەپێی راپۆرتەکە لە ساڵی ٢٠١٩دا، ٦٦ حاڵەتی پێشێلکاریی بەرامبەربە ١٥١ رۆژنامەنووس و دەزگا ئەنجامدراوە کە لەو ژمارەیەش ١٤٤ لە رەگەزی نێر و پێنج رۆژنامەنووسیش لە رەگەزی مێ بوون.
لە راپۆڕتەکەدا، ١٧ حاڵەت لە هەولێر، ١٧ حاڵەت لە سلێمانی و ١٧ حاڵەت لە کەرکووک تۆمارکراون، هەروەها یەک حاڵەت لە بەغدا، یەک حاڵەت لە مووسڵ، یەک حاڵەت لە هەڵەبجە، سێ حاڵەت لە خانەقین و هەشت حاڵەتیش لە دهۆک تۆمار کراون.
لەبارەی ریزبەندیی پێشێلکارییەکانیش، سەرۆکی لیژنەی داکۆکیکردن لە ئازادی رۆژنامەنووسی و مافی رۆژنامەنووسان، نەزاکەت حوسێن گوتی: "دەستگیرکردنی رۆژنامەنووسان لە پلەی یەکەمدایە کە ١٩ حاڵەت بووە و بەرامبەربە ٣٧ رۆژنامەنووس ئەنجامدراوە، رێگریکردن لە رووماڵکردن ٢٤ حاڵەت بووە و بەرامبەربە ٦٢ رۆژنامەنووس ئەنجامدراوە، هێرش و سووکایەتی پێ کردن ١٠ حاڵەت بووە و بەرامبەربە ٢٢ رۆژنامەنووس ئەنجامدراوە، لێدان دوو حاڵەت بووە کە بەرامبەربە سێ رۆژنامەنووس ئەنجامدراوە و دەستبەسەرکردن چوار بووە کە حاڵەت بووە و بەرامبەربە ١٧ رۆژنامەنووس ئەنجامدراوە".
سەندیکای رۆژنامەنووسان لە ساڵی رابردوودا، هەشت بەیاننامە و دوو روونکردنەوەی سەبارەت بە رۆژنامەنووسان بڵاوکردووەتەوە.
نەقیبی سەندیکای رۆژنامەنووسان، ئازاد حەمەدەمین گوتی: "راپۆرتەکانمان لەسەر ئاستی نێودەوڵەتی ئامادەکارییان بۆ کراوە و کاریان لەسەر کراوە، بۆیە راپۆرتەکانمان بۆ ناوەندە فەرمییەکانی جیھان نێردراوە و کاریگەریی هەبووە، ئێستاش بە هەماهەنگی وەزارەتی ناوخۆ، سەرقاڵی رێککەوتنێکین، بۆ ئەوەی هێزە ئەمنییەکان رۆژنامەنووسان بناسنەوە".
هاوکات سەرۆکی لیژنەی رۆشنبیری و راگەیاندن و پەیوەندییەکان لە پەرلەمانی کوردستان، سەلمە فاتیح رایگەیاند کە لیژنەکەیان ئاگاداری پێشێلکارییەکانی بەرامبەربە رۆژنامەنووسانە و جەختیشی لەوە کردەوە کە هەوڵدەدەن بەوردی دەستنیشانی هۆکاری پێشێلکارییەکان بکەن.
