سلێمانی.. گردبوونەوەی ناڕەزایی كارمەندانی خۆبەخشی تەندروستی

سلێمانی - AA
ئەو كارمەندانە كە ژمارەیان دەیان دەرچووی بەشی پەرستاری و تەندروستی پەیمانگاكانە و وەك خۆبەخش ماوەی چەند ساڵێكە لە نەخۆشخانەكان كاردەكەن، داوا دەكەن حكوومەت لە دامەزراندنی كارمەندانی تەندروستی ئەوان لەپێش هەركەسێكی ترەوە دابنێت.

لە داواكارییەكیشدا كە ئاراستەی بەڕێوەبەری گشتی تەندروستی سلێمانی كراوە، ئەو كارمەندانە دەڵێن: "ئێمە وەك كارمەندانی خۆبەخش كە بۆ ماوەی دوو ساڵ زیاترە لە تێكڕای ناوەندەكانی تەندروستی و نەخۆشخانەكاندا لە ناو شار و دەرەوە كاردەكەین، داواكارین وەك خەمخۆری تەندروستی داواكانمان بگەیەنن بە تێكڕای لایەنە پەیوەندیدارەكان و داوای دامەزراندن دەكەین، چونكە زیاتر لە چوار ساڵە كارمەند خانەنشین دەكرێت و شوێنەكانیان پڕ نەكراوەتەوە، ئەوەش بۆتە بارگرانی بۆ نەخۆشخانەكان لە خزمەتكردنی نەخۆشدا".

یەك لە نوێنەرانی ئەو كارمەندانە ئاری كەریم بە ئاژانسی ئانادۆڵوی گوت: "وەك دەرچووانی بەشە پزیشكییەكانی پەیمانگا ئەوە بۆ جاری دووەمە لە بەردەم بەڕێوەبەرایەتی تەندروستی سلێمانی ئەنجام دەدەین بۆ داواكردنی دامەزراندن، ئەوەش دوای ئەوەی لە ماوەی رابردوودا وەزیری تەندروستی زیاتر لە 500 كەسی وەك كارمەندی تەندروستی دامەزراند بەبێ‌ ئەوەی دەرچووانی پەیمانگا و خۆبەخشان لەخۆ بگرێت، ئێستاش بڕیاری ئەوە هەیە هەزار كەسی تر وەك كارمەندی تەندروستی دابمەزرێت بەبێ‌ ئەوەی ناوی خۆبەخشانی تێدا بێت".

ئەو گوتی: "لەلایەن وەزارەتی تەندروستییەوە مافی كارمەندانی خۆبەخشی تەندروستی فەرامۆشكراوە، كە بەشێكی ماوەی سێ‌ تا چوار ساڵە وەك كارمەندی خۆبەخش لە نەخۆشخانە و بنكە تەندروستییەكان كار دەكەن".

ئەو كارمەندە خۆبەخشانەی تەندروستی ئاماژە بەوەش دەكەن، لە سنووری پارێزگای سلێمانی ژمارەیان دەگاتە زیاتر لە 870 كەس و چاوەڕوانی دامەزراندن دەكەن.