کۆنفرانسی هەدەکە

هاوگوتەبێژی کۆنگرەی دیموکراتی گەل ئێرتوغروڵ کورکجو لە یەکەمین کۆنفرانسی هەدەکە گوتارێکی پێشکەش کرد و باسی لە چەند پرسێکی هەنووکەیی تورکیا کرد. ناوبراو رایگەیاند "تورکیا و ناوچەکە لە نێو قەیرانێکی گەورەدان، بەتایبەتی چەند شارێکی خۆرهەڵات و خۆرهەڵاتی باشووری تورکیا کە ئۆپەراسیۆنیان تێدا بەردەوامە، نموونەیەکی پڕ بە پێستی ئەم بارەی ئێستان".

کورکجو لەبارەی پرسی خۆسەری و نیمچە سەربەخۆیی کوردانی تورکیاوە گوتی: "دەبینین کە کوردەکان لە پێناوی ئازادی لە بەرخودانێکی چڕدان و داوای خۆسەری و نیمچە سەربەخۆیی دەکەن. هەرچی تورکیای تاکڕەو و مەزهەبچیشە بەشێوەیەکی دیکتاتۆرانە دەیەوێت لە رێی تانک و تۆپەوە ئەو داواکارییە رەتبکاتەوە. ئەوەی لەو ناوچانە درێژەی هەیە، تەنیا شەڕ و پێکدادان نییە. بەڵکو دەرخستن و نمایشێکی گفتوگۆی چەک و هێزیشە".

ناوبراو هاتە سەرباسی مامۆستایانی زانکۆ و گوتی: "ئەوەی هەنووکە لەئارادایە، فیکر و بیری چەندین خوێنەوارە لەبارەی ئەم رەوشەی وڵات تێی کەوتووە. ئەم رۆشنبیرانە تەواوی بۆچوون و رای خۆیان خستۆتە چوارچێوەیەکی گونجاوەوە. چوارچێوەیەک کە لەسەر ویستەکانی گەل و رای گشتی داڕێژراوە. پێشنیازێکە رای گشتی پەسندی دەکات بەڵام لەگەڵ ویست و دەوڵەت ناگونجێت. هەربۆیە حکومەت ئەم رۆشنبیرانەی بە پێشێلکار و تێکدەر وەسف کرد".