کۆبوونەوەی پەرلەمانی کوردستان

ھەولێر - AA

ئەمڕۆ دووشەممە پەرلەمانی کوردستان بە بەشداری حکوومەتی ھەرێمی کوردستان بۆ گفتوگۆکردن لەبارەی مووچە و داھاتی خاڵە سنوورییەکان کۆبووەوە.

بەپێی بەرنامەی کاری کۆبوونەوەکە، گفتوگۆ لەسەر چەند تەوەرێک دەکرێت لە بریتیین لە؛ درێژکردنەوەی ویلایەتی سەرۆکی دیوانی چاودێریی دارایی ھەرێمی کوردستان بۆ ماوەی چوار ساڵ کە لە رۆژی تەواوبوونی ماوەی خولی یەکەمیەوە دەست پێ دەکات.

ھەروەھا لە بەشێکی دیکەی دانیشتنەکەدا، خوێندنەوەی یەکەم بۆ ئەم پڕۆژە و پێشنیازەیاسایانە دەکرێت کە بریتیین لە؛ پرۆژەیاسای نیشان و میدالیا لە ھەرێمی کوردستان. پڕۆژەیاسای کۆمپانیا ئەمنییە تایبەتەکان لە ھەرێمی کوردستان. پرۆژەیاسای بەرھەمھێنان و ھاوردەکردنی بنەتۆ و شەتڵ و تۆمارکردن و پەسەندکردن و پارێزگاریکردن لە تەرزە کشتوکاڵییەکان لە ھەرێمی کوردستان. پێشنیازەیاسای ھەمواری یاسای چاودێریی ناکامەکان ژمارە (٧٨)ی ساڵی ١٩٨٠ی ھەموارکراو لە ھەرێمی کوردستان. پێشنیازەیاسای ھەمواری یاسای چاودێریی نەوجەوانان ژمارە (٧٦)ی ساڵی ١٩٨٣ و ھەموارەکانی لە ھەرێمی کوردستان. پێشنیازەیاسای ھەمواری یاسای بزربووەکان لە ھەڵمەتەکانی لەناوبردنی بەکۆمەڵی گەلی کوردستانی عێراق ژمارە (٣)ی ساڵی ١٩٩٩. پێشنیازەیاسای ھەمواری دووەمی یاسای دەستەی دەسپاکیی ھەرێمی کوردستان ژمارە (٣)ی ساڵی ٢٠١١. پێشنیازەیاسای گەشتوگوزار لەھەرێمی کوردستان'.

ھەروەھا لە بڕگەی سێییەمی دانیشتنەکەدا گفتوگۆ لەسەر درێژکردنەوەی خولی بەھارەی ساڵی سێیەم لە خولی پێنجەمی ھەڵبژاردنی پەرلەمانی کوردستان دەکرێت بۆ ماوەی (٣٠) رۆژ.

لە بەشێکی دیکەی دانیشتنەکەدا، خستنەڕوو و گفتوگۆکردنی چۆنیەتیی پڕکردنەوەی کورتھێنانی مووچە و ھۆکارەکانی جێبەجێنەبوونی یاسای چاکسازی و یاسای بوودجەی عێراق و کەموکوڕیی خاڵە سنوورییەکان و داھاتی نەوت و داھاتی ناوخۆ بەئامادەبوونی لایەنی پەیوەندیدار لە حکوومەتی ھەرێمی کوردستان.