ههولێر - شوان سديق
پرسی هەرە گرنگ لە كۆنگرەی حزبەكانی هەرێمی كوردستان، بابەتی گۆڕینی سەرۆكی حزبەكەیە و كەسێكی تر جێگرەوەی بێت.
كۆمەڵی ئیسلامی لە كوردستان، هاوشێوەی حزبەكانی تر یەكێك لەو پرسە گرنگانەی كە لە ئێستادا رووبەڕووی دەبێتەوە گۆڕینی عەلی باپیرە كە ساڵانێكە پۆستی ئەمیر بەڕێوە دەبات.
رۆژی شەممە كۆمەڵی ئیسلامی لە كوردستان، بە بەشداری 787 ئەندام، سێیەمین كۆنگرەی خۆی دەستپێكرد بڕیارە سێ رۆژ بخایەنێت.
كۆمەڵی ئیسلامی لە كوردستان، مێژووی دامەزراندنی دەگەڕێتەوە، بۆ سەرەتاكانی ساڵی 2000 كاتێك كۆمەڵێك سەركردەی بزووتنەوەی ئیسلامی لەو حزبە جیابوونەوە و كۆمەڵی ئیسلامی لە كوردستانیان راگەیاند.
كۆمەڵی ئیسلامی لە كوردستان، لە مانگی ئایاری 2001 دامەزراوە، تا ئێستا دوو كۆنگرەی ئەنجامداوە، رۆژی 30.5.2015 سێیەمین كۆنگرەی لە هۆڵی ئەوتار لە شاری هەولێر دەستپێكرد.
لەو دوو كۆنگرەی كە كۆمەڵی ئیسلامی ئەنجامیداوە، عەلی باپیر وەك ئەمیری ئەو حزبە لە پۆستەكەیدا ماوەتەوە.
هەر لە دەستپێكی كۆنگرەكەش پرسی جێگرەوەی عەلی باپیر لەسەر ئاستی میدیایی و لای چاودێران و تەنانەت لایەنگرانی كۆمەڵی ئیسلامیش جێی قسە و گفتوگۆكردنە.
رۆژنامەنووسانیش لە كاتی بەرێوەچوونی رۆژی یەكەمی كۆنگرەگە سەبارەت بە مانەوە و هەڵبژاردنەوەی عەلی باپیر بێدەنگ نەبوون پرسیاریان لە گوتەبێژی كۆنگرەكە كرد.
لە وەڵامی پرسیارێك ئایا عەلی باپیر كە ساڵانێكە ئەمیری كۆمەڵی ئیسلامییە هەڵدەبژێردرێتەوە؟. گوتەبێژی كۆنگرەی سێیەمی كۆمەڵی ئیسلامی، پەیوەند عومەر گوتی: "ئەوەی خودا دروستیكردووە، بەدیلی هەیە هیچ مرۆڤێك نییە بەدیلی نەبێت، سەبارەت بە مامۆستا عەلی باپیریش یان دەكرێت نموونەیەك لەسەر لایەنی سیاسی بێنینەوە ئەویش كێن ئەوكەسانەی كۆدەنگی هەیە لەسەریان ئێمە قسەمان لەسەر ئیجماع و كۆدەنگیە لەسەر كەسەكان قسەمان لەسەر ئەوەنییە مامۆستا عەلی بەدیلی هەیە یاخوود نا ".
هەروەها گوتەبێژی كۆنگرەكە گوتیشی: "لەو چەند ساڵەی كە مامۆستا علی باپیر ئەمیری كۆمەڵی ئیسلامی بووە زۆرترین كۆدەنگی لەسەر بووە، بۆیە ماوەتەوە لە پۆستی وەكو ئەمیری كۆمەڵی ئیسلامی".
لە بارودۆخی ئەمرۆی هەرێمی كوردستان و بەپێی گەڕانەوە بۆ كۆنگرەی دووەمی كۆمەڵی ئیسلامی كە كۆدەنگی دووبارە عەلی باپیری دانایەوە بە ئەمیری حزبەكەیان، پێدەچێت لەم كۆنگرەیەش هەمان سیناریۆی كۆنگرەی رابردوو دووبارە ببێتەوە. و باپیر وەك ئەمیری كۆمەڵی ئیسلامی هەڵببژێردرێتەوە.
گوتەبێژی كۆنگرەی ئەو حزبەش دەڵێت "بیرۆكەی دانانی جێگر یان سكرتێری ئەمیری كۆمەڵی ئیسلامی لە ئارادایە ئەوەش بەندە بەوەی ئایا ئەندامانی كۆنگرە چۆن و بەچ میكانیزمێك بەگرنگی دەزانن ئەمیری كۆمەڵی جێگری هەبێت، یاخود نا گفتوگۆی لەسەر دەكرێت.
عەلی باپیر وەتمان، لە ساڵی 1961 لە سنووری ناحیەی سەنگەسەری قەزای پشدەری سەربە پارێزگای سلێمانی لە دایك بووە، ساڵی 1981 كۆلێژی فیقهی لە نەجەف خوێندووە.
پاپیر لە ساڵانی هەشتاكان پەیوەندی بە بزووتنەوەی ئیسلامی كوردستانەوە كردووە.
ساڵی 1987 بەشدار بووە وەك ئەندام لە شاندی بزووتنەوەی ئیسلامی كوردستان، لەگەڵ حزبەكانی كوردستان دا.
لە 31.5.2001 لەگەڵ ژمارەیەك سەركردە و كادیری بزووتنەوەی ئیسلامی جیا دەبێتەوە، حزبێك بەناوی كۆمەڵی ئیسلامی كوردستان رادەگەیەنن.
لە خوولی دووەمی ئەنجوومەنی نوێنەرانی عێراق لەسەر لیستی كۆمەڵی ئیسلامی بووە ئەندامی ئەنجوومەن.
عەلی باپیر ساڵی 2003 لە هاوینەهەواری دوكانی نزیك شاری سلێمانی لایەن هێزەكانی ئەمریكا دەستگیركراو رەوانەی ناوەڕاستی عێراق كرا و 22 مانگ لە بەندیخانەی فڕۆكەخانەی بەغدای پایتەخت زیندانی كرا.
عەلی باپیر ناسناوی مامۆستایە و زیاتر بە مامۆستا بانگ دەكرێت، یان ناوی دەهێنرێت. خاوەنی چەندین كتێب و بڵاوكراوەیە لە بارەی سیاسەت و بنەماكانی ئایینی ئیسلام.
