نێچیرڤان بارزانى پێشوازی لە وەزیرى بەرگریى ئیتاڵیا كرد

ھەولێر - AA

سەرۆکی ھەرێمی کوردستان، نێچیرڤان بارزانی پێشوازی لە وەزیری بەرگری ئیتاڵیا، لۆرێنزۆ گوێرینی کرد.

بەپێی ھەواڵێکی ماڵپەری فەرمی سەرۆکایەتی ھەرێمی کوردستان، ئێوارەی ئەمڕۆ سێشەممە ١٧/١٢/٢٠١٩ لە ھەولێر، سەرۆکی ھەرێمی کوردستان، نێچیرڤان بارزانی پێشوازی لە وەزیری بەرگری ئیتاڵیا، لۆرێنزۆ گوێرینی کردووە و لەم چوارچێوەیەشدا سوپاسی وڵاتی ئیتالیای کردووە بۆ ئەو ھاوکاری و پشتگیرییە سەربازییانەی کاتی شەڕی داعش لە چوارچێوەی ھاوپەیمانیی نێودەوڵەتیدا پێشکەش بە ھەرێمی کوردستان کراوە.

ھاوکات سەرۆکی ھەرێمی کوردستان، نێچیرڤان بارزانی رۆڵی پسپۆڕانی سەربازیی ئیتاڵی لە مەشقپێکردن و ڕاھێنانی پێشمەرگە بەرز نرخاند.

ھەر لەمیانی کۆبوونەوەکەدا سەرۆکی ھەرێم، نێچیرڤان بارزانی جەختی کردەوە کە سەرھەڵدانەوەی تیرۆر لە عێراق و ناوچەکە مەترسییەکی راستەقینەیە و ھەڕەشە لە ئاسایشی جیھانیش دەکات، بۆیە بەردەوامیی ھاوکاری و ھەماھەنگیی نێودەوڵەتی بۆ بەرەنگاربوونەوەی ئەو ھەڕەشەیە بە ئەرک و پێویست زانی.

لەلایەکی دیکەش وەزیری بەرگری ئیتاڵیا، لۆرێنزۆ گوێرینی ڕێز و پێزانینی ئیتاڵیای بۆ ھەرێمی کوردستان و پێشمەرگە دووپات کردەوە کە لە شەڕی دژی تیرۆر و تێکشکاندنی داعشدا رۆڵیکی گەورەیان بینی و بەرگرییان لە ھەموو پێکھاتەکانی ھەرێمی کوردستان کرد، ھەروەھا بەردەوامیی پشتگیریی وڵاتەکەی بۆ ھەرێمی کوردستان و عێراق لە بەرەنگاربوونەوەی تیرۆر و پاراستنی ئارامی و سەقامگیریی ناوچەکە، نیشان دا.

ھاوکات لە کۆبوونەوەکەی ھەردوولا، جێگرانی سەرۆکی ھەرێمی کوردستان، وەزیرانی پێشمەرگە و ناوخۆ و ژمارەیەک لە بەرپرسانی حکوومەتی ھەرێمی کوردستان، باڵیۆزی ئیتاڵیا لە عێراق و کونسوڵی ئیتاڵیا لە ھەولێر و ژمارەیەک لە پلەداران و راوێژکارانی ئیتاڵی ئامادەی بوون.

ھەر لە دیدارەکەدا پرسی ھاریکاری و ھەماھەنگیی ئەمنیی نێوان ھەرێمی کوردستان و حکوومەتی فیدراڵی عێراق بۆ ڕووبەڕووبوونەوەی مەترسییەکانی تیرۆر، دوایین دۆخی عێراق و خۆپیشاندانەکانی بەغدا و پارێزگاکانی دیکەی وڵات، پێشھاتەکانی سووریا و دۆخی ناوچەکە بەگشتی، تاوتوێ کران.