لیست و قه‌واره‌كانی به‌شدار له‌ هه‌ڵبژاردنه‌كانی په‌رله‌مان ژماره‌یان پێدرا

هه‌ولێر-AA
29 لیست كێبڕكێ له‌سه‌ر 111 كورسیی په‌رله‌مانی كوردستان له‌هه‌ڵبژاردنه‌كانی ئه‌یلول ده‌كه‌ن، 10 لیستییان كێبڕكێ له‌سه‌ر 100 كورسی، 8 لیستی دیكه‌ كێبڕكێ له‌سه‌ر 5 كورسی كۆتای توركمان، 5 لیستیش كێبڕكێ له‌سه‌ر 5 كورسیی كلدان سریان ئاشوورییه‌كان ده‌كه‌ن، تاكی ئه‌رمه‌نیش پێنج قه‌واره‌ كێبڕكێ له‌سه‌ر یه‌ك كورسی ده‌كه‌ن.

ئه‌مڕۆ دووشه‌ممه‌ كۆمیسیۆنی باڵای سه‌ربه‌خۆی هه‌ڵبژاردن و راپرسی له‌ هه‌رێمی كوردستان تیروپشكی بۆ لیست و قه‌واره‌ و هاوپه‌یمانێتییه‌كان بۆ هه‌ڵبژاردنی په‌رله‌مانی كوردستان كه‌ بڕیاره‌ له‌ كۆتایی ئه‌یلولی ئه‌مساڵ به‌ڕێوه‌بچێت له‌ هۆڵی گالاكسی له‌ شارۆچكه‌ی عینكاوه‌ی هه‌ولێر ئه‌نجامدا.
له‌و رێوڕه‌سمه‌ كه‌ به‌ ئاماده‌بوونی به‌شێك له‌ به‌رپرسانی كۆمیسیۆن و نوێنه‌رانی لایه‌ن و قه‌واره‌ و هاوپه‌یمانێتییه‌كان و نوێنه‌رانی چه‌ند رێكخراوێكی چاودێر به‌سه‌ر هه‌ڵبژاردنه‌كان و ده‌زگاكانی راگه‌یاندنه‌وه‌ ئه‌نجامدرا تیروپشك بۆ 29 لیست و قه‌واره‌ و هاوپه‌یمانێتی ئه‌نجامدرا.
به‌ڕێوه‌به‌ری گشتی فه‌رمانگه‌ی په‌یوه‌ندی و راگه‌یاندن شۆڕش حه‌سه‌ن له‌ وتارێكدا گوتی" له‌سه‌ره‌تای پڕۆسه‌ی ئاماده‌كاریكردن بۆ ئه‌نجامدانی هه‌ڵبژاردنی په‌رله‌مانی كوردستان له‌ 25ی ئایاره‌وه‌ ده‌ستمان به‌ تۆماركردنی هاوپه‌یمانێتییه‌كان و دواتر قه‌واره‌كان و ئینجا وه‌رگرتنی لیستی ناوی كاندیدانی ئه‌و قه‌واره‌ و هاوپه‌یمانێتییانه‌ به‌رده‌وامیین له‌ ئاماده‌كارییه‌كان، ده‌مانه‌وێت كاره‌كان به‌شه‌فافی و له‌به‌رده‌م نوێنه‌رانی لایه‌ن و قه‌واره‌كان و ده‌زگاكانی راگه‌یاندن به‌ڕێوه‌بچێت، رۆژ به‌ رۆژ له‌ پڕۆسه‌ی ئه‌نجامدانی هه‌ڵبژاردنی په‌رله‌مانی كوردستان نزیك ده‌بینه‌وه‌، هیوادارین ئه‌م پڕۆسه‌یه‌ش به‌سه‌ركه‌وتوویی به‌ڕێوه‌بچێت".
سه‌رۆكی كارگێڕی هه‌ڵبژاردن د.رێزان حه‌مه‌ره‌شید له‌و رێوڕه‌سمه‌دا بۆ ده‌زگاكانی راگه‌یاندن و ئاماده‌بووان رایگه‌یاند" دوای ئه‌وه‌ی رۆژی 30ی ئه‌یلول بۆ خولی پێنجه‌می هه‌ڵبژاردنی په‌رله‌مانی كوردستان كارگێڕی هه‌ڵبژاردن خشته‌ی كرداره‌كانی بۆ سه‌رجه‌م قۆناغه‌كانی هه‌ڵبژاردن ئاماده‌كرد و له‌ 27ی ئایار تۆماركردنی قه‌واره‌ و هاوپه‌یمانێتییه‌كان ده‌ستی پێكرد، له‌ رۆژی حه‌وتی ته‌موزه‌وه‌ بۆ لیستی پاڵێوراوانمان دیاریكردووه‌ بۆ ماوه‌ی 19 رۆژ، ئه‌مڕۆ 16ی ته‌موزه‌ تیروپشك ئه‌نجامده‌ده‌ین بۆ سه‌رجه‌م قه‌واره‌ و لیسته‌كان بۆ هه‌ڵبژاردنی په‌رله‌مانی كوردستان".
گوتیشی" كۆمیسیۆن هه‌نگاوێكی بوێرانه‌ی ناوه‌ له‌ دامه‌زراندن و ئاماده‌كردنی تۆمارێكی نوێ بۆ ده‌نگده‌ران كه‌ تایبه‌ت بێت به‌ كۆمیسیۆنی هه‌ڵبژاردن و راپرسی هه‌رێمی كوردستان كه‌ له‌ ماوه‌ی هه‌شت مانگ و رۆژانه‌ به‌ تێكڕا هه‌شت كاتژمێر كاری تێداكراوه‌ و هه‌ندێك رۆژ 15 كاتژمێر كاركراوه‌ بۆ ته‌واوكردنی ئه‌و تۆماره‌، كه‌ له‌ ئه‌نجامی ئه‌و تۆماره‌ توانراوه‌ له‌سه‌روو 200 هه‌زار ده‌نگده‌ر له‌ تۆماره‌ نوێیه‌كه‌ی خۆمان بسڕینه‌وه‌، هه‌روه‌ها رێكاری بژاركردنه‌وه‌ و وردبینی كردن جێبه‌جێكردن كه‌ سڕینه‌وه‌ و سڕكردنی 56 هه‌زار و 536 ده‌نگده‌ر كرا كه‌ داتای لێكچوونی ناوی سییانی و داتای ته‌مه‌ن و سه‌روو 90 ساڵ، بۆیه‌ ئێمه‌ وه‌كو كۆمیسیۆن به‌ ئه‌ركی خۆمان هه‌ڵساوین و ئێوه‌ش هاوكارمان بن بۆ ئه‌وه‌ی هیچ ده‌نگده‌رێكی وه‌همی نه‌هێنرێته‌وه‌ بۆ نێو تۆماره‌كه‌ و هاوكارمان بۆ ئه‌وه‌ی هاوڵاتییان سه‌ردانی بنكه‌كانی تۆماری ده‌نگدان بكه‌ن و نه‌هێڵن به‌ به‌ڵگه‌ی ساخته‌ ناوه‌كان بچێته‌وه‌ نێو تۆماره‌كه‌ و تۆماره‌كه‌مان بۆ پیس نه‌كرێته‌وه‌، هه‌روه‌ها ده‌نگده‌رانتان هانبده‌ن بۆ ئه‌وه‌ی به‌شداریی له‌ ده‌نگدان بكه‌ن، چونكه‌ ئه‌مه‌ رێگه‌ خۆش ده‌كات له‌وه‌ی ده‌رفه‌تی كه‌متر بۆ ساخته‌كاری ده‌مێنێته‌وه‌، هه‌روه‌ها رێژه‌ی به‌شداریی زیاد ببێت ئه‌وا رێژه‌ی ئه‌نجامی هه‌ڵبژاردنه‌كه‌ زیاد ئه‌بێت".
دواتر له‌به‌رچاوی نوێنه‌رانی قه‌واره‌ و لیست و هاوپه‌یمانێتییه‌كان و ده‌زگاكانی راگه‌یاندن پڕۆسه‌ی تیروپشكه‌كه‌ ئه‌نجامدرا و قه‌واره‌ و لیست و هاوپه‌یمانێتییه‌كان ژماره‌ی خۆیان وه‌رگرت كه‌ به‌و ژماره‌یه‌ به‌شداریی هه‌ڵبژاردنه‌كانی 30ی ئه‌یلول ده‌كه‌ن و ژماره‌كانیش بۆ لیسته‌كانی كورسیی گشتی كه‌ 100 كورسیی په‌رله‌مانی كوردستانه‌ به‌مشێوه‌یه‌ بوون:

-پارتی دیموكراتی كوردستان، ژماره‌ی لیست 183.
-ئازادی، ژماره‌ی لیست 164.
-كۆمه‌ڵی ئیسلامی كوردستان، ژماره‌ی لیست 194.
-هاوپه‌یمانی بۆ دیموكراسی و دادپه‌روه‌ری، ژماره‌ی لیست 172.
-یه‌كێتی نیشتمانی كوردستان، ژماره‌ی لیست 105.
-بزووتنه‌وه‌ی گۆڕان، ژماره‌ی لیست 148.
-جوڵانه‌وه‌ی نه‌وه‌ی نوێ، ژماره‌ی لیست 134.
-پارتی پارێزگارانی كوردستان، ژماره‌ی لیست 156.
-هاوپه‌یمانی سه‌رجه‌م، ژماره‌ی لیست 127.
-هاوپه‌یمانی به‌ره‌و ئیسلاح، ژماره‌ی لیس 119

هه‌رچی ئه‌و قه‌وارانه‌یه‌ كه‌ بۆ به‌شداریی له‌ هه‌ڵبژاردنی په‌رله‌مان تیروپشكیان بۆ كرا بۆ به‌ده‌ست هێنانی پێنج كورسیی په‌رله‌مانی له‌سه‌ر سیسته‌می كۆتا، به‌مشێوه‌یه‌ بوون:
-لیستی به‌ره‌ی توركمانی عێراقی، ژماره‌ی لیست 272.
-پارتی چاكسازی توركمانی، ژماره‌ی لیست 258.
-بزووتنه‌وه‌ی برووسكه‌ی توركمانی(یڵدرم)، ژماره‌ی لیست 246.
-لیستی توركمانی دیموكراتی، ژماره‌ی لیست 203.
-لیستی توركمانی هه‌ولێر، ژماره‌ی لیست 267.
-پارتی گه‌شه‌پێدانی توركمان، ژماره‌ی لیست 215.
-لیستی میلله‌ت، ژماره‌ی لیست 224.
-هاوپه‌یمانی توركمانی هه‌ولێر، ژماره‌ی لیست 239.

هه‌رچی لیست و قه‌واره‌ و هاوپه‌یمانێتییه‌كانی پێكهاته‌ی كلدان سریان ئاشوورییه‌ كه‌ پێنج كورسییان به‌پێی سیسته‌می كۆتا له‌ كۆی 111 كورسیی په‌رله‌مانی كوردستان بۆ ته‌رخانكراوه‌، ئه‌وا ژماره‌كانییان به‌مشێوه‌یه‌یه‌:
-ئه‌نجوومه‌نی كلدان سریانی ئاشووری، ژماره‌ی لیست 344.
-لیستی رافیده‌ین، ژماره‌ی لیست 306.
-لیستی دیموكراتی مه‌سیحی، ژماره‌ی لیست 384.
-حزب أبنا ْ النهرین، ژماره‌ی لیست 317.
-هاوپه‌یمانی یه‌كێتی نه‌ته‌وه‌یی، ژماره‌ی لیست 368.

هه‌رچی قه‌واره‌كانی تاكی ئه‌رمه‌نه‌ كه‌ یه‌ك كورسیی په‌رله‌مانییان به‌سیسته‌می كۆتا بۆ ته‌رخانكراوه‌ به‌مشێوه‌یه‌ ژماره‌كانییان بۆ ده‌رچوو:
-تاكی ئه‌رمه‌ن نۆبار سیپان، ژماره‌ی لیست 408.
-تاكی ئه‌رمه‌ن یروانت نیسان، ژماره‌ی لیست 489.
-تاكی ئه‌رمه‌ن ئارام بوزو، ژماره‌ی لیست 452.
-تاكی ئه‌رمه‌ن موراد ماردروس وارتان، ژماره‌ی لیست 476.
-تاكی ئه‌رمه‌ن فاهیك كمال سرانییان، ژماره‌ی لیست 497.
-تاكی ئه‌رمه‌ن ادكار هاكوب بترۆس، ژماره‌ی لیست 423.