عیرفان عەلى عەبدولعەزیز: "کۆبوونەوەى لایەنەکان ئیجابى بووە"

سلێمانى - AA
رابەرى گشتى بزووتنەوەى ئیسلامى کوردستان، عیرفان عەلى عەبدولعەزیز راگەیاند "پەیامەکەى مسعود بارزانى بووە هۆى ئەوەى بارودۆخى هەرێمى کوردستان بەشێوەیەکى باش بگۆڕدرێت، هێزە سیاسیەکان وەڵامى ئیجابى باشیان دایەوە و چەندین کۆبوونەوە لەنێوان وەفدى باڵاى پارتى دیموکراتى کوردستان و لایەنە سیاسیەکان بەرێوەچووە".
عیرفان عەلى عەبدولعەزیز بۆ ئاژانسی ئانادۆڵو گوتی: "هەر ئەو وەفدە لەم چەند رۆژەى رابردوودا سەردانى سلێمانی-یان کرد و لەگەڵ هەریەکە لە یەکێتىی نیشتیمانیى کوردستان و بزووتنەوەى گۆڕان و بزووتنەوەى ئیسلامى کۆبوونەوە. کۆبوونەوەکەی پارتى و یەکێتى کۆبوونەوەیەکى زۆر گرنگ بوو و کۆبوونەویەکى ئیجابى بوو و هەروەها لەگەڵ گۆڕانیش کۆبوونەوە کە ئەوەش کۆبوونەویەکى ئیجابى و باش بووە و لەگەڵ ئێمە وەک بزووتنەوەی ئیسلامی کۆبوونەوە و کۆبوونەوەیەکى باش و ئیجاى بووە".

رابەرى گشتى بزووتنەوەى ئیسلامى کوردستان گوتیشى: "ئێمە کە لە وەفدەکەى پارتیمان پرسى کۆبوونەوەکەى نێوان پارتى دیموکراتى کوردستان و هێزەکانى دیکە بەتایبەت یەکێتى و گۆڕان چۆن بووە ئەوان لە وەڵامدا گوتیان کە کۆبوونەوەکان کۆبوونەوەى باش بوون و بزووتنەوەى گۆڕانیش خۆشیان کۆبوونەوەکەیان پێ باش بووە و بە کۆبوونەوەیەکى ئیجابیان وەسف کرد".

عیرفان عەلى عەبدولعەزیز ئەوەشى گوت "کۆبوونەکان سەرەتایەکە بۆ لێکتێگەیشتن و هەروەها بۆ چارەسەرکردنى قەیرانەکانى هەرێمى کوردستان کە کەڵەکە بوون و بە ئەنجامدانی کۆبوونەوەکان ئەو بەستەڵەکەی کە هەبوو لەنێوان لایەنەکان تێکشکێنراوە".

رابەرى گشتى بزووتنەوەى ئیسلامى کوردستان، عیرفان عەلى عەبدولعەزیز ئەوەشى راگەیاند "ئەو کۆبوونەوانە ئەنجامێکى باشى دەبێت چونکە یەکەم جارە لە کۆبوونەوەکاندا باسى گۆڕینى سەرجەم دەسەڵاتەکان دەکرێت کە ئەمەش کارێکى زۆر باش و ئیجابییە".

عیرفان عەلى عەبدولعەزیز گوتیشى: "پاش ئەوەى وەفدی باڵاى پارتى گەڕانەوە، لەگەڵ مسعود بارزانى کۆدەبنەوە و رابۆچوونى لایەنەکان هەڵدەسەنگێنن و دواتر لەکۆى ئەو کۆبوونەوانەى کە کراوە لەگەڵ لایەنەکان، پرۆژەیەک گەڵاڵە دەکەن و کاردەکەن بۆ چارەسەرکردنى قەیرانەکان و ئومێدەوارین کە سەرجەم قەیرانەکانى هەرێمى کوردستان کۆتایى پى بهێنرێت".