ھەرێمی کوردستان.. ئیدانەی تەقینەوەکانی ئیستانبۆڵ

هەولێر - AA

سەرۆکایەتی ھەرێمی کوردستان لە راگەیەنراوێکدا ئیدانەی تەقینەوەکانی تورکیا دەکات کە شەوی رابردوو لە ئەنجامی دوو تەقینەوەی تیرۆریستی لە دەرەوەی یاریگایەک لە شاری ئیستانبۆڵی تورکیادا ژمارەیەک ھاووڵاتی و پۆلیس بوونە قوربانی و ژمارەیەکی زۆریش بریندار بوون.

لە راگەیەنراوەکەی سەرۆکایەتی هەرێمی کوردستاندا هاتووە "شەوی ١٠ی کانوونی یەکەمی ٢٠١٦ لە ئەنجامی دوو تەقینەوەی تیرۆریستی لە دەرەوەی یاریگایەک لە شاری ئیستانبۆڵی تورکیادا ژمارەیەک ھاووڵاتی و پۆلیس بوونە قوربانی و ژمارەیەکی زۆریش بریندار بوون".

سەرۆکایەتی هەرێمی کوردستان ئیدانەی ئەو پەلامارە دەکات، هاوکات سەرەخۆشی لە کەسوکاری قوربانییان دەکات و هیوای چاکبوونەوەش بۆ برینداران دەخوازێت.

لە بەشێکی دیکەی راگەیەنراوەکەدا هاتووە "ئامانجی تیرۆریستان تێکدانی ئاسوودەیی ھاووڵاتییان و شێواندنی ژیان و ئۆقرەییە لە ھەموو شوێنێکی جیھان، بەڵام لەوە دڵنیاین کە کردە و ھزری نامرۆڤانەی تیرۆریستان کۆتاییەکەی شکستە و سەرناکەون".