په‌یوه‌ندی ته‌له‌فۆنی پۆمپیۆ له‌گه‌ڵ به‌رهه‌م ساڵح و عادل عه‌بدولمه‌هدی

واشنتۆن – AA

له‌ میانی په‌یوه‌ندییه‌كی ته‌له‌فۆنیدا له‌گه‌ڵ هه‌ریه‌ك له‌ سه‌ركۆماری عێراق، به‌رهه‌م ئه‌حمه‌د ساڵح و سه‌رۆكوه‌زیرانی عێراق، عادل عه‌بدولمه‌هدی، وه‌زیری ده‌ره‌وه‌ی ئه‌مریكا، مایك پۆمپیۆ جه‌ختی له‌سه‌ر به‌رده‌وامیدانی به‌ پشتیوانی وڵاته‌كه‌ی بۆ عێراق كرده‌وه‌ بۆ له‌ناوبردنی پاشماوه‌كانی داعش له‌ ناوچه‌كه‌.

جێگری گوته‌بێژی وه‌زاره‌تی ده‌ره‌وه‌ی ئه‌مریكا، رۆبه‌رت پۆڵادینۆ رایگه‌یاند پۆمپیۆ به‌ جیا په‌یوه‌ندی ته‌له‌فۆنی له‌گه‌ڵ به‌رهه‌م ئه‌حمه‌د ساڵح و عادل عه‌بدولمه‌هدی ئه‌نجام داوه‌.

پۆڵادینۆ راگه‌یه‌ندراوه‌كه‌یدا ئاماژه‌ی به‌وه‌ داوه‌ له‌ په‌یوه‌ندییه‌كه‌دا پۆمپیۆ له‌باره‌ی "چۆنێتی هه‌ره‌سهێنان به‌ داعش له‌ سووریا" بۆ هه‌ردوولایان دواوه‌. نووسیوویه‌تی: "پۆمپیۆ جه‌ختی له‌ به‌رده‌وامیدانی پشتیوانی وڵاته‌كه‌ی بۆ عێراق كردۆته‌وه‌ كه‌ له‌ كاتێكدا به‌رده‌وامی ده‌درێت به‌ به‌ره‌نگاربوونه‌وه‌ی پاشماوه‌كانی داعش كۆششیش ده‌كرێت بۆهێنانه‌دی داهاتوویه‌كی سه‌قامگیرتر و خۆشگوزه‌رانه‌تر".

پۆمپیۆ له‌ په‌یوه‌ندییه‌كه‌یدا له‌گه‌ڵ عادل عه‌بدولمه‌هدی تیشكی خستۆته‌ سه‌ر ئه‌وه‌ی هاوپه‌یمانی نێوده‌وڵه‌تی دژی داعش به‌ سه‌رۆكایه‌تی ئه‌مریكا به‌رده‌وام ده‌بێت له‌ هه‌ماهه‌نگی نزیك له‌گه‌ڵ هێزه‌ ئه‌منییه‌كانی عێراق بۆ پاككردنه‌وه‌ی عێراق له‌ پاشماوه‌كانی داعش.

له‌ راگه‌یه‌ندراوه‌كه‌دا تیشك خراوه‌ته‌ سه‌ر ئه‌وه‌ی له‌ په‌یوه‌ندییه‌ ته‌له‌فۆنیه‌كاندا له‌باره‌ی گرنگی هه‌ماهه‌نگی ستراتیجی ئه‌مریكا و عێراق دواون و تاوتوێی هاوكاری ئابووری ئه‌مریكا بۆ عێراق كراوه‌.

سه‌رۆكی ئه‌مریكا دۆناڵد تره‌مپ پێشتر رایگه‌یاندبوو كه‌ وڵاته‌كه‌ی له‌ به‌ره‌نگاربوونه‌وه‌ی داعشدا سه‌ركه‌وتووبووه‌ و سه‌ربازانی ئه‌مریكا له‌ سووریا ده‌كێشێته‌وه‌.