وڵاتانی رۆژئاوا و ناتۆ لە بارەی لەشکرکێشی رووسیا بۆسەر ئۆکراینا گفتوگۆیان کرد

بڕۆکسل - AA

یەکێتیی ئەورووپا، ئەمریکا، ناتۆ و رێکخراوی ئاسایش و هەماهەنگیی ئەورووپا (OSCE) دەربارەی لەشکرکێشییەکانی رووسیا بۆسەر سنووری ئۆکراینا و ئاسایشی ئەورووپا، پەیوەندییەکی تەلەفۆنییان ئەنجام دا.

لە پەیوەندییە تەلەفۆنییەکەدا، وەزیری دەرەوەی ئەمریکا، ئەنتۆنی بلینکن و نوێنەری باڵای یەکێتیی ئەورووپا لە سیاسەتی دەرەکی و کاروباری ئاسایش، جۆزێپ بۆڕێڵ و سکرتێری گشتیی ناتۆ، یەنس ستۆڵتنبێرگ و نوێنەری پۆڵەندا وەک سەرۆکی قۆناغی ئێستای رێکخراوی ئاسایش و هەماهەنگی ئەورووپا، ئامادەبوون.

یانس ستۆڵتنبێرگ دەربارەی پەیوەندییە تەلەفۆنییەکە لە هەژماری تایبەتی خۆی لە تۆڕە کۆمەڵایەتییەکان نووسیویەتی: "ئاماژە بوو بۆ یەکگرتووییەکی بەهێز لە کاتێکی هەستیاری وەک ئێستادا".

هەروەها نووسینگەی جۆزێپ بۆڕێڵ لە راگەیەندراوێکدا، ئەوەی خستووەتەڕوو کە لەبارەی لەشکرکێشییەکانی رووسیا بۆسەر سنووری ئۆکراینا و هەوڵە دیپلۆماسییەکانی مۆسکۆ بۆ دووبارە پێناسەکردنەوەی ئاسایشی ئەورووپا، گفتوگۆیان کردووە.

لە راگەیەندراوەکەدا باس لەوەش کراوە کە بەشداربووان هاوڕابوون لەسەر پێویستی بەردەوام بوونی بنەماکانی پاراستنی رێکخراوی ئاسایش و هەماهەنگیی ئەورووپا.