لووتکەی نێوان ترەمپ و کیم ھەڵوەشایەوە

واشنتۆن - AA

سەرۆکی ئەمریکا، دۆناڵد ترەمپ نامەیەکی بۆ سەرۆکی کۆریای باکوور، کیم جۆنگ-ئون نووسی و تێیدا رایگەیاند کە بەشداری لە لووتکەکەی سینگاپور ناکات.

نامەکەی ترەمپ کە بۆ کیم جۆنگ-ئون نووسیویەتی لەلایەن کۆشکی سپییەوە بڵاوکرایەوە کە تێدا ھاتووە "بەھۆی نیشاندانی توڕەیی و دوژمنایەتی ئاشکرا لەلایەن سەرۆکی کۆریای باکوور، کیم جۆنگ ئون لەو لێدوانانەی دوایی، ترەمپ بەشداری لە لووتکەی نێوان خۆی و سەرۆکی کۆریای باکوور لە سینگاپور ناکات کە بڕیاربوو لە ١٢ی حوزەیران ئەنجام بدرێ".

ھاوکات ترەمپ لە نامەکەیدا بەرگری لەوەش کرد کە کۆریای باکوور و جیھانیش دەرفەتێکی گەورەیان بەمەبەستی دەستەبەرکردنی ئاشتی ھەمیشەیی لەدەستداوە.

سەرۆکی کۆریای باکوور، کیم ھەڕەشەی لە ترەمپ کردبوو کە بەشداری لە لووتکەی سینگاپور نەکات بەھۆی ئەو مانۆڕە سەربازییە ھاوبەشەی لە نێوان کۆریای باشوور و ئەمریکا لە ھەفتەی رابردوو دەستیپێکردووە.

ترەمپ دوێنێ لەدوای گفتوگۆیەکەی لەگەڵ سەرۆکی کۆریای باشوور، موون جای -ئین رایگەیاندبوو کە لەوانەیە لووتکەی سینگاپور لە ١٢ی حوزەیران ئەنجام نەدرێ.