"رۆژانه‌ 40 تا 50 كرێكاری بیانی له‌ هه‌رێمه‌وه‌ ده‌گه‌ڕێنه‌وه‌ وڵاتانی خۆیان"

هه‌ولێر - AA
جێگری به‌ڕێوه‌به‌ری گشتی كارو ده‌سته‌به‌ری كۆمه‌ڵایه‌تی له‌ وه‌زاره‌تی كارو كاروباری كۆمه‌ڵایه‌تی حكوومه‌تی هه‌رێمی كوردستان، نه‌زمی موسا رایگەیاند "به‌ هۆی داخستنی فڕۆكه‌خانه‌كانی هه‌رێمی كوردستان به‌ رووی گەشتی نێوده‌وڵه‌تی، كرێكاری بیانی كه‌متر دێنه‌ هه‌رێمه‌وه‌".
نه‌زمی موسا له‌ لێدوانێكدا بۆ ئاژانسی ئانادۆڵو گوتی: "به‌ هۆی شه‌ڕی داعش و قه‌یرانی داراییه‌وه‌ هاتنی كرێكاری بیانی بۆ هه‌رێم كه‌میكردووه‌ و له‌ به‌رامبه‌ریشدا چوونه‌وه‌ی كرێكاری بیانی له‌ هه‌رێمه‌وه‌ بۆ وڵاتانی خۆیان زیادی كردووه‌".
نه‌زمی موسا له‌و باره‌یه‌وه‌ ئاشكرای كرد "له‌دوای شه‌ڕی داعش و دواتر قه‌یرانی دارایی كه‌ به‌دواییدا هات ره‌وشی كارو كرێكار له‌ هه‌رێمی كوردستان رووی له‌ كه‌می و لاوازییه‌، به‌تایبه‌ت كرێكاری بیانی، هاتنی كرێكاری بیانی بۆ هه‌رێمی كوردستان تا دێت روو له‌ كه‌می ده‌كات و داواكاریی له‌سه‌ر ئه‌مان به‌تایبه‌ت له‌ ساڵی 2017 كه‌می كردووه‌. له‌ ئه‌مساڵدا ئه‌وه‌ی تا ئێستا داواكراوه‌ له‌وانه‌یه‌ له‌ سنووری دوو هه‌زار كرێكار بووبێت كه‌ بێن بۆ هه‌رێمی كوردستان، له‌گه‌ڵ ئه‌وه‌شدا له‌وانه‌یه‌ ئه‌و دوو هه‌زار كرێكاره‌ نیوه‌یان، واته‌ له‌ سنووری 50 له‌سه‌دی ئه‌و ژماره‌یه‌ هاتبێتنه‌ ناو هه‌رێمی كوردستان، ئه‌وانی دیكه‌ به‌ هۆكاری جیاجیا نه‌هاتوونه‌ته‌ هه‌رێمی كوردستانه‌وه‌".

سه‌باره‌ت به‌ چوونه‌وه‌ی كرێكاران و جێهێشتنی هه‌رێمی كوردستان به‌ هۆی ئه‌و بارودۆخه‌ی دروستبووه‌، نه‌زمی موسا گوتی: "كرێكاران به‌ به‌رده‌وامی ده‌گه‌ڕێنه‌وه‌ بۆ وڵاتانی خۆیان ئه‌وانه‌ی ساڵانی پێشتر لێره‌ بوون چی به‌ هۆی كۆتایی هاتنی گرێبه‌سته‌كانییان بێت، چی بە هۆی كه‌می كار و نه‌مانی پڕۆژه‌ و قه‌یرانی دارایی بێت كه‌ رۆژانه‌ له‌ نزیكی 40 تا 50 كرێكار ده‌گه‌ڕێنه‌وه‌ بۆ وڵاته‌كانی خۆیان".

ئه‌و به‌رپرسه‌ی وه‌زاره‌تی كارو كاروباری كۆمه‌ڵایه‌تی له‌ درێژه‌ی قسه‌كانیدا روونی كرده‌وه‌، داخستنی فڕۆكه‌خانه‌كانی هه‌رێم به‌ رووی گه‌شته‌ نێوده‌وڵه‌تییه‌كاندا هۆكارێكی دیكه‌یه‌ له‌ دوو مانگی دوایی بۆ كه‌مبوونه‌وه‌ی كرێكاری بیانی، ئه‌و ده‌ڵێت "هۆكارێكی دیكه‌ هه‌یه‌ بۆ كه‌مكردبوونەوه‌ی كرێكاری بیانی له‌ هه‌رێمی كوردستان، ئه‌ویش ئه‌وه‌یه‌ ئه‌و دوو مانگه‌ی دوایی به‌ هۆی ئه‌وه‌ی فڕۆكه‌خانه‌كانی هه‌رێمی كوردستان له‌ لایه‌ن حكوومه‌تی عێراقه‌وه‌ داخراون ئیدی هاتنی كرێكاری بیانی كه‌می كردووه‌ته‌وه‌، به‌شێكی زۆر كه‌مییان له‌ رێگه‌ی سنووره‌كانی ئێران و توركیاوه‌ دێن، ئه‌گه‌ر نا ناچن بۆ فڕۆكه‌خانه‌ی به‌غدا و له‌ عێراقه‌وه‌ نایه‌ن بۆ ئێره‌".

به‌ هۆی زۆریی پڕۆژه‌كانی وه‌به‌رهێنان و سه‌رمایه‌گوزاری له‌ هه‌رێمی كوردستان و هه‌روه‌ها داهاتی تاكه‌كه‌سیی نزیك له‌ پێنج هه‌زار دۆلار له‌ ساڵێكدا بارودۆخی ئابووریی خه‌ڵك له‌ كوردستاندا به‌ره‌و باشی ده‌چوو و تا ده‌هات پشتبه‌ستن به‌ كرێكاری بیانی زۆرتر ده‌بوو و به‌شێكی زۆری ئه‌مانیش له‌ ماڵان و فه‌رمانگه‌ و كۆمپانیا و دامه‌زراوه‌كاندا بۆ كاروباری خزمه‌تكاری و خاوێنكردنه‌وه‌ كارییان پێ ده‌كران، به‌ڵام دواتر به‌ هۆی شه‌ڕی داعش له‌ ساڵی 2014 و بڕینی به‌شه‌ بوودجه‌ی هه‌رێم له‌ لایه‌ن به‌غداوه‌ و دواتر سه‌رهه‌ڵدانی قه‌یرانی دارایی بارودۆخی ئابووری دانیشتوانی هه‌رێم به‌ره‌و خراپی رۆیشت.

سه‌باره‌ت به‌و كرێكارانه‌شی له‌ ئێستا دێنه‌ هه‌رێمی كوردستانه‌وه‌ و ئه‌وانه‌شی كه‌ له‌ ئێستادا هه‌رێمی كوردستان به‌جێ ده‌هێڵن، نه‌زمی موسا روونی ده‌كاته‌وه‌ "ئه‌و كرێكاره‌ بیانییانه‌ی ده‌هێنرێن له‌ ئێستادا زیاتر خزمه‌تكاری نێو ماڵانن كه‌ دێن و كرێكاری پڕۆژه‌كان كه‌متر دێن، ئه‌وانه‌شی له‌ هه‌رێمی كوردستانه‌وه‌ ده‌چنه‌وه‌ بۆ وڵاتانی خۆیان كرێكاری پڕۆژه‌كانن و كرێكاری خزمه‌تكاری ماڵان كه‌متر ده‌چنه‌وه‌".

سه‌باره‌ت به‌ ژماره‌ی وردی كرێكارانی بیانی كه‌ له‌ هه‌رێمی كوردستاندا له‌ ئێستادا كارده‌كه‌ن، ئه‌و به‌رپرسه‌ی وه‌زاره‌ی كارو كاروباری كۆمه‌ڵایه‌تی ده‌ڵێت "كرێكاری بیانی كه‌مبووه‌ته‌وه‌ و ئێستا به‌ وردی ژماره‌ی كۆتاییان ئه‌وانه‌ی له‌ هه‌رێمی كوردستاندا له‌ كارن نازانیین، چونكه‌ كرێكاران كه‌ دێن له‌ رێگه‌ی نشینگه‌ و مانه‌وه‌ ده‌بێت زیاتر، به‌ڵام له‌ لای ئێمه‌ به‌ته‌واوی ده‌رناكه‌وێت، هه‌روه‌ها له‌به‌ر ئه‌وه‌ی رۆژانه‌ هاتن و چوون هه‌یه‌ له‌و كرێكارانه‌ بۆ هه‌رێم و لێوه‌ی ئه‌وه‌ش كاتی ده‌وێت كه‌ ژماره‌ی ته‌واوییان وه‌رده‌گیرێت".

له‌ كۆتایی قسه‌كانیدا نه‌زمی موسا له‌باره‌ی رێژه‌ی بێكارییه‌وه‌ گوتی: "قەیرانی دارایی تا زیاتر بێت رێژه‌ی بێكاری زیاتر ده‌بێت، به‌ پێی ئامار و رووپێویییه‌كان كه‌ وه‌زاره‌تی پلاندانان له‌ رابردوودا ئه‌نجامیدابوو رێژه‌ی بێكاری زیاتر له‌ 14 له‌سه‌د بوو، به‌ڵام ئێستا زیاتر بووه‌ و رێژه‌كه‌ زیاتر هه‌ڵكشاوه‌".