ترەمپ پەیوەندییەکی تەلەفۆنی لەگەڵ سەرکردەیەکی تاڵیبان ئەنجامدا

واشنتۆن/ کابول - AA

سەرۆکی ئەمریکا، دۆناڵد ترەمپ رایگەیاند، پەیوەندییەکی تەلەفۆنیی لەگەڵ سەرکردەیەکی بزووتنەوەی تاڵیبان ئەنجامداوە و دەربارەی رێککەوتنی ئاشتیی نێوان ئەمریکا-تاڵیبان قسەیان کردووە.

ترەمپ، بەر لە بەڕێکەوتنی بۆ ویلایەتی ماریلاند لە باخچەی کۆشکی سپی بۆ رۆژنامەنووسان لێدوانی دا.

دەربارەی دەنگۆکانی پەیوەندیکردنی بە یەکێک لە سەرکردەکانی تاڵیبان ترەمپ گوتی: "لەگەڵ سەرکردەیەکی تاڵیبان بە تەلەفۆن قسەمان کرد. ھاوڕابووین لەوەی کە توندوتیژیمان ناوێت. دەبینین چی روودەدات".

ترەمپ، سەبارەت بە پەیوەندییە تەلەفۆنییەکەی لەگەڵ سەرکردەکەی بزووتنەوەی تاڵیبان گوتیشی: "زۆر بە باشی بەڕێوەچوو".

لای خۆیەوە گوتەبێژ بەناوی بزووتنەوەی تاڵیبان، زەبیحوڵڵا موجاھید رایگەیاند، سەرۆکی ئەمریکا، دۆناڵد ترەمپ پەیوەندییەکی تەلەفۆنیی لەگەڵ جێگری سەرکردەی بزووتنەوەی تاڵیبان، عەبدوڵڵا غەنی برادەر، ئەنجامدا.

زەبیحوڵڵا موجاھید لە ھەژماری فەرمی لە تۆڕی کۆمەڵایەتی تویتەر بڵاوی کردووەتەوە کە پەیوەندییە تەلەفۆنییەکە بە ئامادەبوونی نێردەی تایبەتی سەرۆکی ئەمریکا بۆ ئەفغانستان، زەڵمای خەلیل زاد و ژمارەیەک لە سەرکردەکانی بزووتنەوەی تاڵیبان ئەنجامدراوە.

بە گوتەی زەبیحوڵڵا موجاھید، پەیوەندییە تەلەفۆنییەکەی نێوان ترەمپ و برادەر ٣٥ خولەکی خایاندووە، ترەمپ رایگەیاند کە برادەر لە پێناو وڵاتەکەی دەجەنگێت.

ئەم پەیوەندییە تەلەفۆنییە دوای چەند رۆژێک دێت لە رێککەوتنی نێوان ئەمریکا و بزووتنەوەی تاڵیبان کە ھەردوولا رێککەوتوون لەسەر دانانی خشتەیەک بۆ کشانەوەی ھێزەکانی ئەمریکا لە ئەفغانستان.