ئەمریکا بۆ رێککەوتنێکی نوێ مەرجێکی ١٢ خاڵی دەخاتە بەردەم ئێران

واشنتۆن - AA

وەزیری دەرەوەی ئەمریکا مایک پۆمپیۆ بانگھێشتی ئێرانی کرد کە بەرھەمھێنانی چەکی ناوەکی رابگرێ و کۆتایی بە پشتیوانیکردنی لە "گرووپە تیرۆرستییەکان" بھێنێ، بە پێچەوانەوە "قورسترین سزای مێژوو" لەسەر ئەو وڵاتە جێبەجێ دەکەن.

لە دوای ئەوەی سەرۆکی ئەمریکا، دۆناڵد ترەمپ کشانەوەی وڵاتەکەی لە رێککەوتنی ناوەکی ئێران راگەیاند، مایک پۆمپیۆ وتارێکی لە ناوەندی بیرکردنەوەی The Heritage Foundation پێشکەش کرد و باسی لە ستراتیژی وڵاتەکەی بەرامبەر ئێران کرد.

پۆمپیۆ ئاشکراشی کرد کە دەبێ رێککەوتنێکی نوێ لەگەڵ ئێران ئەنجام بدرێ و بۆ ئەمەش مەرجێکی ١٢ خاڵی راگەیاند.

پۆمپیۆ باسی لەوەش کرد کە پێویستە ئێران کارەکانی ئێستا و پێشووی پەیوەندیدار بە چەکی ناوەکی بە ئاژانسی وزەی ناوەکی نێودەوڵەتی رابگەیەنێت و بەرھەمھێنانی یۆرانیۆمیش رابگرێ.

پۆمپیۆ جەختیشی لەوە کردەوە کە ئێران پێویستە رێگە بە سەردانیکردنی تیمی ئاژانسی وزەی ناوەکی نێودەوڵەتی بۆ نێو دامەزراوەکانی ناوەکی ئێران بکات و کۆتایی بە تاقیکردنەوەی مووشەکی بالیستی بھێنێ.

ھاوکات پۆمپیۆ داوای کرد کە ئەو ھاووڵاتییە ئەمریکیانەی لە ئێران دەستبەسەرکراون ئازادبکرێن و گوتیشی : "پێویستە ئێران واز لە پشتیوانی کردنی رێکخراوەکانی تیرۆریستی بە گشتی و بەتایبەتی حزبوڵای لوبنان، حەماس و گروپەکانی جیھادی ئیسلامی فەڵەستینی بھێنێت".

پۆمپیۆ جەختی کردەوە لەوەی کە ئێران دەبێت رێز لە سەروەری خاکی عێراقی ھاوسنووری بگرێت و گوتیشی: " دەبێت واز لە پڕچەککردنی شیعەکان و دەستێوەردانی سیاسەتی ناوخۆی عێراق بھێنێت".

ھاوکات وەزیری دەرەوەی ئەمریکا داوای کرد ئێران کۆتایی بە پشتیوانییەکانی بھێنێت بۆ حوسییەکان و گوتیشی دەبێت ھەرچی زووە قۆناغی ئاشتی لەو وڵاتە دەستپێبکات.

ئەو وەزیرە بەتایبەتی دوپاتی کردەوە کە ئێران دەبێت واز لەو کارانە بھێنێت کە دەبێتە ھۆی ھەڕەشە بۆسەر ئیسرائیل.

وەزیری دەرەوەی ئەمریکا مایک پۆمپیۆ ئەوەی نەشاردەوە کە ئەگەر بێت و ئێران مەرجەکان جێبەجێ نەکات ئەوکات قورسترین سزای دەدەن لە مێژووی وڵاتەکە