ئەمریكا شەش ملیۆن بەڵگەنامەی سەردەمی بەعسی گەڕاندەوە عێراق

هەولێر ــ AA

رۆژنامەی وۆڵ ستریت جۆرناڵ بڵاوی كردەوە كە ئەمریكا شەش ملیۆن بەڵگەنامەی سەردەمی رژێمی بەعسی رووخاوی، گەڕاندووەتەوە عێراق.

رۆژنامەی ناوبراو لە هەواڵێكدا بڵاوی كردەوە كە فڕۆكەیەكی سەربازی ئەمریكی شەش ملیۆن بەڵگەنامەی حزبی بەعسی گەڕاندووەتەوە بەغدا.

بەپێی رۆژنامەی وۆڵ ستریت جۆرناڵ، ئەمریكا وەك نیشاندانی نیازباشی بۆ سەرۆكوەزیرانی عێراق، مستەفا كازمی شەش ملیۆن بەڵگەنامەی سەردەمی رژێمی بەعسی رووخاوی گەڕاندووەتەوە عێراق و لەئێستادا لە شوێنێكی نهێنی پارێزراو لە بەغدا هەڵگیراون.

لەگەڵ پەرەسەندنی كردەکانی توندتیژی لە عێراق 15 ساڵ لەمەوبەر و بە تایبەتیش دوای دووساڵ لە رووخاندنی سەرۆكی رژێمی پێشووی عێراق، سەدام حوسێن كە یەكێك بوو لە سەركردەكانی بەعس، ئەمریكا ئاشكرای كردبوو كە كۆمەڵێك ئەرشیف و بەڵگەنامەی جۆراجۆری رژێمی بەعسی رووخاوی، بە ئامانجی پاراستنیان، هەڵگرتووە.

لە 2013دا ئەمریكا كۆمەڵێك لەو بەڵگەنامانەی گەڕاندبووەوە عێراق، بەڵام ئەوە ترسی لای لێكۆڵەرانی رۆژئاوا دروست كرد لەوەی کە ئەگەری هەیە ئەو بەڵگەنامانە وەك كارتی سیاسی لەلایەن سەرۆكوەزیرانی پێشووتری عێراق، نوری مالیكی-یەوە بەكاربهێندرێن.

لە نیسانی 2020دا، كاتێك گرژیی و ئاڵۆزییەکان ناوەڕاست و باشووری عێراقی گرتەوە، نووسەری بەناوبانگی عێراقی، كەنعان مەكییە و سەرۆكوەزیرانی ئێستای عێراق مستەفا كازمی كە ئەو كات دامەزراوەی بیرەوەری عێراقی بەڕێوەدەبرد لە بەریتانیاوە گەڕانەوە عێراق و چەندین بەڵگەنامەیان لە ماڵی كەنعان مەكییە پاراست.

لە ساڵی 2008 دامەزراوەی هۆڤەر سەربە زانكۆی ستانفۆرد لە ڤێرجینیا رایگەیاندبوو كە دەستەی پاراستنی بەڵگەنامەكان لە ئەمریكا بەهاوكاری دەزگای پەیوەندی پاراستنی كەنەدا، بەڵگەنامەكانی سەردەمی بەعسیان گەڕاندووەتەوە بۆ عێراق، كە پێشتر بەڵگەنامەكان بۆ پاراستنیان لە بەغداوە گواسترابوونەوە بۆ ئەمریكا و لای خۆیەوە كەنعان مەكییەش ئاشكرای كردبوو كە حكوومەتی عێراق رەزامەندی نیشانداوە لەسەر ریكخستنەوەی بەڵگەنامەكان لەلایەن دامەزراوەی هۆڤەری ئەمریكییەوە.