ئەفغانستان.. تەقینەوەیەک ٢٠ کوژراوی لێکەوتەوە

ئەفغانستان ـ AA

ژمارەی قوربانیانی ئەو تەقینەوەیەی لە رێگەی ئۆتۆمۆبێلێکی بارھەڵگری بۆمبڕێژکراو لە بەردەم دەزگای ھەواڵگری گشتی ئەفغانستان لە ویلایەتی زابولی باشووری وڵاتەکە رویدا بۆ ٢٠ کوژراو و زیاتر لە ٩٠ بریندار بەرز بوویەوە.

سەرۆکی ئەنجوومەنی خۆجێی ویلایەتەکە، عەتا جان حەق رایگەیاند، بەھۆی تەقینەوەکە ٢٠ کەس کوژراون و زیاتر لە ٩٠ کەسی تریش بریندار بوون و زیانی زۆریش بە نەخۆشخانەیەکی نزیک شوێنی تەقینەوەکە گەیشتووە.

بەرپرسانی ئەمنیی باسیان لەوە کرد کە ھێرشەکە لە نزیک نەخۆشخانەی گشتی زابول ئەنجامدراوە، بەو ھۆیەوە نەخۆش و کەسوکاریان کە ژمارەیەکیان ژن و منداڵن لەنێو قوربانییاندان.

پێشتر گوتەبێژی ویلایەتی زابول، گول ئیسلام سیال بە رۆژنامەنووسانی راگەیاند کە لە تەقینەوەکەدا، حەوت کەس کوژراون و ٩٣ی دیکەش برینداربوون.

لەلای خۆیەوە بزووتنەوەی تاڵیبان بەرپرسیارێتیی خۆی لە ئەنجامدانی تەقینەوەکە راگەیاند.

لە دوای داگیرکردنی ئەفغانستان لە ساڵی ٢٠٠١ لەلایەن ئەمریکاوە، ئەو وڵاتە بووەتە گۆڕەپانی جەنگ و ململانێی نێوان ھێزەکانی تاڵیبان لەلایەک و ھێزەکانی سەر بە حکوومەت و ھاوپەیمانی نێودەوڵەتی لەلایەکی تر، بەو ھۆیەشەوە ھەزاران ھاووڵاتی سڤیل بوونەتە قوربانی.