" عومەر ئەلبەشیر سوودانی جێنەھێشتووە، لە ماڵ زیندانی کراوە"

خەرتووم - AA

فەرماندەی ھێزەکانی پشتیوانی خێرای سوپای سوودان، جەنەراڵ محەمەد حەمدان داقلو رایگەیاند کە سەرکۆماری لابراوی سوودان، عومەر ئەلبەشیر لە شاری خەرتوومی پایتەخت لە نێو ماڵ زیندانی کراوە.

داقلو لە لێدوانێکیدا بۆ کەناڵێکی ناوخۆیی سوودان گوتی:" عومەر ئەلبەشیر سوودانی جێنەھێشتووە، لە ماڵ زیندانی کراوە".

داقلو ئاماژەی بەوەشدا کە بەرەنگاربوونەوەی عومەر بەشیر بۆ ماوەی چوار مانگ لە دژی خۆپیشاندەران وایکرد سوپا سەرکۆمار لەسەر کار لاببات.

جەنەڕاڵ داقلو ئاماژەی بەوەشدا کە بەشیر نیازی ئەوەی نەبووە دەسەڵات بە شێوەیەکی ئاسایی جێبھێڵێت.

داقلو باسی لەو گۆڕانکارییە کرد کە لە ئەنجوومەنی راگوزەری سەربازیی کراوە و رایگەیاند کە وەزیری بەرگری، عەوز بن عۆف لەلایەن خۆپیشاندەران نەویستراوە، بەڵام گەل و سوپای سوودان پێشوازیان لە عەبدولفەتاح ئەلبورھان کردووە.