ھەرێمی کوردستان.. لە کۆی ٤٠٤ تووشبووی کۆرۆنا ٣٨٣ یان چاکبوونەتەوە

ھەولێر - AA

وەزارەتی تەندروستیی ھەرێمی کوردستان رایگەیاند، لەو پشکنینانەی لە ٢٤ کاتژمێری رابردوودا بۆ گومانلێکراوانی تووشبوو بە ڤایرۆسی کۆرۆنای نوێ (COVID-19) لە ھەرێمی کوردستان ئەنجامیانداوە، سەرجەمیان نێگەتیڤ بوون و ھیچ تووشبوویەکی نوێ تۆمارنەکراوە.

وەزارەتی تەندروستیی ھەرێمی کوردستان سەبارەت بە پەتای ڤایرۆسی کۆرۆنای نوێ (COVID-19) لە ھەرێمی کوردستان، راگەیەنراوێکی بڵاوکردەوە.

بەپێی راگەیەنراوەکە، لە میانی ٢٤ کاتژمێری رابردوودا، هەزار و ٨٢ پشکنین لەسەر ئاستی هەرێمی کوردستان کە ٥١١ لە هەولێر، ٣٤٥ لە سلێمانی و ٢٢٦ پشکنین لە دهۆک ئەنجام دراوە.

وەک لە راگەیەنراوەکەدا کە کۆپییەکی گەیشتووەتە ئاژانسی ئانادۆڵو ئاماژەی پێدراوە، بەپێی دەرەنجامی پشکنینەکان، ھیچ تووشبوویەکی نوێ لە ھەرێمی کوردستان تۆمارنەکراوە.

وەزارەتی تەندروستیی ھەرێمی کوردستان ئاماژەی بەوەشکردووە کە لە سەرەتای سەرھەڵدانی ڤایرۆسی کۆرۆناوە تا ئێستا ٦٠ هەزار و ٤٨٣ پشکنین ئەنجامدراوە.

لە راگەیەنراوەکەی وەزارەتی تەندروستی ھەرێمی کوردستاندا ئاماژە بەوەشدراوە کە لە کۆی ١١ هەزار و ٢٥ ھاووڵاتیی کەرەنتین کراو، نۆ هەزار و ٨٤٩ هاووڵاتیی لە کەرەنتین دەرچوون و دوای تەواوکردنی ماوەی ١٤ رۆژ و ئەنجامدانی پشکنینی تاقیگەیی بۆیان و پشتڕاستکردنەوەی ئەوەی کە ھەڵگری ئەو نەخۆشییە نین، گەڕانەوەتە ناو خانەوادەکانیان و لە ئێستادا تەنھا هەزار و ١٧٦ هاووڵاتیی لە ٣٢ شوێنی جیاوازی کەرەنتین ماونەتەوە کە ٥١٥ لە هەولێر، ١٣٦ لە سلێمانی، ٤٩٧ لە دهۆک و یەک کەسیش لە راپەرین.

ئەوەش ئاشکرا کراوە کە لە ٢٤ کاتژمێری رابردوودا، ١١ هاووڵاتیی دیکە کەرەنتین کراون.

بەپێی داتاکانی وەزارەتی تەندروستی حکوومەتی ھەرێمی کوردستان، کۆی گشتی تووشبووان بە ڤایرۆسی کۆرۆنای نوێ COVID-19 لە ھەرێمی کوردستان لە ئێستادا ٤٠٤ تووشبوو، لەنێویاندا پێنج حاڵەتی گیانلەدەستدان ھەیە و ٣٨٣ نەخۆش چاکبووەتەوە، و لەئێستادا تەنھا ١٦ نەخۆش لەژێر چاودێری پزیشکی دان.

حکوومەتی ھەرێمی کوردستان بۆ رێگرییکردن لە بڵابوونەوەی زیاتری ڤایرۆسی کۆرۆنا، زنجیرەیەک رێکاری گرتەبەر لەوانە قەدەغەکردنی ھاتوچۆ، راگەیاندنی پشوو لە ناوەندەکانی خوێندن، داخستنی مزگەوت و شوێنە گشتییەکانی وەک پارک، مۆڵ، قاوەخانە، سینەماکان و چەند شوێنێکی دیکە، ھەروەھا وەستاندنی گەشتە ئاسمانییەکان و داخستنی دەروازە سنوورییەکان.