ھەرێمی کوردستان.. حاڵەتێکی دیکەی کۆرۆنا لە سلێمانی تۆمار کرا

ھەولێر - AA

وەزیری تەندروستی حکوومەتی ھەرێمی کوردستان، سامان بەرزنجی رایدەگەیەنێت کە حاڵەتێکی دیکەی تووشبوو بە ڤایرۆسی کۆرۆنا لە سلێمانی تۆمارکراوە کە ئەندامی ھەمان ئەو خێزانەیە کە چوار کەسیان تووشی ڤایرۆسی کۆرۆنا بوون.

وەزیری تەندروستی حکوومەتی ھەرێمی کوردستان سامان بەرزنجی لە کۆنگرەیەکی رۆژنامەوانییدا گوتی: ''لە ٢٤ کاتژمێری رابردوودا ٢٧ کەس رەوانەی پشکنین کراون، لەو ژمارەیە ٢٥ پشکنین نەرێنی بوونە، و یەک حاڵەتی ئەرێنی بووە کە لە ھەمان ئەو خێزانەیە کە چوار کەسیان تووشی ڤایرۆسی کۆرۆنا بوونە،ھەروەھا کەسەکەی دیکەش ھێشتا ئەنجامی پشکنینەکەی دەرنەچووە''.

لە بارەی ژمارەی ئەو کەسانەی لە کەرەنتینن، وەزیری تەندروستی حکوومەتی ھەرێمی کوردستان گوتی: ''١٨٤ کەس ئەمڕۆ کەرەنتین کراون و بە گشتی دوو ھەزارو ٨٨٤ کەس لە ٢٧ شوێنی جیاجیا کە لە شار و قەزاکان تەرخانکراون و تا ئێستاش ٨٩ کەس پشکنینی بۆ کراوە''.

سامان بەرزنجی راشیگەیاند کە ٢٠٠ ھەزار ماسکی ئاسایی لەلایەن وڵاتی چینەوە پێشکەش بە ھەرێمی کوردستان کراوە و ھەروەھا پەیڕەوی چارەسەری تەندروستی بۆ توشبووان بڵاوکراوەتەوە.

لە بارەی دابینکردنی ئامێریشەوە، سامان بەرزنجی باسی لەوەکرد کە ئامێری پێشکەوتووی پشکنینی ڤایرۆسەکە گەیشتووە و بەسەر نەخۆشخانەکاندا دابەش دەکرێت.

وەزیری تەندروستی حکوومەتی ھەرێمی کوردستان، سامان بەرزنجی ئاشکرایشی کرد کە کۆبوونەوەی فراوانی نێوان وەزارەتی تەندروستی و سەرجەم کونسوڵخانە و نوێنەرایەتییەکان ساز دەکەن و لە بارەی رێنماییەکانیش داوای لە سەرجەم خاوەن چێشتخانەکان کرد کە بەردەوام پاک و خاوێنی بپارێزن و دەستکێش بۆ کارمەندەکانیان دابین بکەن، ھەروەھا پاک و خاوێنی تەواوی خواردن و ھەڵگرتنیش رەچاو بکەن، داوایشی لە سەرجەم ئەو گەشتیارانە کرد کە لە دەرەوەی ھەرێم ھاتوونەتەوە، پابەندی رێنماییەکانی وەزارەتی تەندروستی بن و خۆیان لە تیمەکانی تەندروستی نەشارنەوە.

دوێنێ یەکشەممە وەزارەتی تەندروستی حکوومەتی ھەرێمی کوردستان تۆمارکردنی چوار حاڵەتی تووشبوون بە ڤایرۆسی کۆرۆنای لە شاری سلێمانی راگەیاند.