ڕۆژی دووهەمی چوارەمین سیمپۆزیەمی نێودەوڵەتی مەلای جزیری لە شرنەخ بەڕێوەدەچێت

هەولێر - AA

چوارەمین سیمپۆزیەمی نێودەوڵەتی مەلای جزیری لە شرنەخ بە هاوکاری و هەماهەنگی قایمقامی جیزرە و زانکۆی شرنەخ لە شارۆچکەی جیزرە سەر بە پارێزگای شرنەخ بەڕێوە دەچێت.

لە سیمپۆزیۆمەکەدا دەیان نووسەر، شاعیر، ئاکادێمی و لێکۆڵەر لە چەندین وڵاتی جیهانەوە لەوانەش سووریا، ئەڵمانیا، ئێران و عێراق بەشدارن.

ڕۆژی یەکەمی کۆنفرانسەکە بە لێدانی مارشی نیشتمانی تورکیا و خوێندنەوەی چەند ئایەتێک لە قورئانی پیرۆز دەستی پێکرد.

هەروەها گوتارێکی سەرکۆماری تورکیا ڕەجەب تەیب ئەردۆغان کە بۆ سیمپۆزیۆمەکەی ناردبوو و کورتە ڤیدیۆیەک لەسەر مەلای جزیری و ژیان و بەرهەمەکانی بەردەوام بوو.

لە ڕۆژی دووهەم و کۆتا ڕۆژی سیپۆزیۆمەکەدا، سەرۆکی پارتی دیموکراتی کوردستان مەسعود بارزانی ئامادەبوو و لە ناو ئاپۆڕای جەماوەری بەشداربووی سیپۆزیۆمەکەدا، پێشوازی لێکرا.

لە میانی سیمپۆزیۆمەکەدا، بارزانی گوتارێکی پێشکەشی بەشداربووان کرد.

مەسعود بارزانی لەبارەی کەسایەتی مەلای جزیری دوا و گوتی، "ئەو ئەستێرەیەکی گەشە و هیچ جارێک ئاوا نابێت و سەرقافڵەی عاشقی ڕێگەی حەقە و شعێرەکانی جزیری هیچ کاتێک کۆن نابن و هەموو جارێ مرۆڤ کە دەیخوێنێتەوە هەست دەکات کە تازەیە، چەندە لە شێعرەکان قوڵ ببیەوە ئەوەندە زیاتر لە جزیری نزیک دەبییەوە و پێی سەرت سووڕ دەمێنێت. لە تەکیەی بارزانی لە حزووری مەولانا شێخ ئەحمەدی بارزانی بە بەردەوام شێعرەکانی جزیری دەخوێندران. بۆ ئێمە دەرکەوت کە چ نزیکییەکی ڕووحی هەیە لە نێوانیاندا چونکە ڕێگەی حەق و حەقیقەت یەکە".

بارزانی بە خوێندنەوەی شێعرێکی مەلای جزیرە لە وەسفی گەورەییدا، گوتی، "خودا کەرەمێکی مەزنی لەگەڵ خەڵکی ئەم دەڤەرە کردووە کە جزیری لێرە بووە و مێژوو لێرە دروست بووە و ئەوەش جێی شانازییەکی مەزنە".

ئەنجامدانی چەندین پانێل لەسەر ڕەهەندە جیاوازەکانی ژیان و بەرهەمەکانی مەلای جزیری، بەشێک دەبن لە بەرنامەکانی کۆتا ڕۆژی سیمپۆزیۆمەکە و چاوەڕوان دەکرێت کۆی وتار و لێکۆڵینەوەکان دواتر لە توێی بەرهەمێکی تایبەتدا بڵاو بکرێتەوە.