"پڕۆسه‌یه‌كی چاره‌سه‌ری نوێ له‌ رۆژه‌ڤی سه‌ركۆماردا نییه‌"

ئه‌نقه‌ره‌ - AA

گوته‌بێژی سه‌رۆكایه‌تی كۆماری توركیا ئیبراهیم كاڵن رایگەیاند: "پڕۆسه‌یه‌كی چاره‌سه‌ری نوێ یان كرانه‌وه‌ له‌ رۆژه‌ڤی به‌ڕێز سه‌ركۆمار (سه‌ركۆماری توركیا ره‌جه‌ب ته‌یب ئه‌ردۆغان)دا نییه‌".

كاڵن له‌ راگه‌یه‌ندراوێكدا تیشكی خستۆته‌ سه‌ر ئه‌وه‌ی كه‌ پڕۆسه‌یه‌كی چاره‌سه‌ری نوێ یان كرانه‌وه‌ له‌ رۆژه‌ڤی سه‌ركۆماری توركیا ره‌جه‌ب ته‌یب ئه‌ردۆغاندا نییه‌.

ئیبراهیم كاڵن ئاماژه‌ی به‌وه‌ داوه كه‌ سه‌ركۆماری توركیا ره‌جه‌ب تەیب ئه‌ردۆغان هه‌م له‌ سه‌رده‌می سه‌رۆكوه‌زیرانیدا هه‌م له‌ سه‌رده‌می سه‌ركۆماریدا خه‌باتی زۆری كردووه‌ بۆ ئه‌وه‌ی هه‌موو هاووڵاتییانی توركیا به‌ یه‌كسانی به‌ مافه‌كانیان بگه‌ن، نووسیوویشیه‌تی: "هه‌موو جۆره‌ جیاكارییه‌ك له‌سه‌ر بنه‌مای ئایینی و نه‌ته‌وه‌یی ره‌تكردۆته‌وه‌ و ئه‌مه‌شی به‌ هه‌نگاوی كرده‌یی سه‌لماندووه‌. خوشك و برا كورده‌كانیشمان وه‌ك هه‌موو تاكه‌كانی دیكه‌ هاووڵاتی یه‌كسانی كۆماری توركیان. سیاسه‌تی ره‌تكردنه‌وه‌، نكۆڵیكردن و پاكتاوكردن له‌ رابردوو، له‌ سه‌رده‌ستی به‌ڕێز سه‌ركۆمار (ره‌جه‌ب ته‌یب ئه‌ردۆغان) كۆتایی پێهات. به‌ره‌نگاربوونه‌وه‌ی رێكخراوی تیرۆریستی په‌كه‌كه‌ بۆ ئازادكردنی سه‌رجه‌م هاووڵاتییان به‌ كوردەکانیشه‌وه‌ له‌ سته‌م و گوشاره‌كانی ئه‌و رێكخراوه، پێداگیرانه‌ به‌رده‌وام ده‌بێت".