ده‌ستگیركردنی 11 كه‌س له‌ رۆژنامه‌ی جومهوریه‌ت

ئیستانبوڵ - AA
له‌ چوارچێوه‌ی ئه‌و لێكۆڵینه‌وه‌یه‌ی کە له‌لایه‌ن سه‌رۆكایه‌تی داواكاری گشتیی كۆماری ئیستانبوڵه‌وه‌ به‌ڕێوه‌ده‌چێت، 11 كه‌س ده‌ستگیركران كه‌ به‌ڕێوه‌به‌ر و نووسه‌رانی رۆژنامه‌ی جومهوریه‌ت-یان له‌نێودایه‌.
له‌و لێكۆلینه‌وه‌یه‌دا كه‌ به‌پێی مادده‌ی 220/6ی یاسای سزادانی توركی و، به‌ تۆمه‌تی "ئه‌ندامبوون له‌ هەردوو رێكخراوی تیرۆریستی فه‌تۆ و په‌كه‌كه‌ و، ئه‌نجامدانی تاوان به‌ناوی ئەو دوو رێكخراوه‌وه‌" به‌ڕێوه‌ده‌چێت، بڕیاری ده‌ستگیركردن بۆ 13 كه‌س ده‌رچووه‌ كه‌ به‌ڕێوه‌به‌ری گشتیی بڵاوكردنه‌وه‌ی رۆژنامه‌ی جومهوریه‌ت، مورات سابونجو، سه‌رۆكی ده‌زگای جێبه‌جێكاری رۆژنامه‌كه‌، ئاكن ئاتاڵای و نووسه‌ری رۆژنامه‌كه‌ گورای ئۆز-یان له‌نێودایه‌.
دوای ده‌رچوونی بڕیاره‌كه‌، له‌لایه‌ن تیمه‌كانی پۆلیسه‌وه‌ هه‌ڵمه‌تی گه‌ڕان و پشكنین بۆسه‌ر چه‌ند ناونیشانێك ئه‌نجامدرا و، تیایدا به‌ڕێوه‌به‌ری گشتیی بڵاوكردنه‌وه‌ی رۆژنامه‌ی جومهوریه‌ت، مورات سابونجو، به‌ڕێوه‌به‌ری گشتیی بڵاوكردنه‌وه‌ی پێشووی رۆژنامه‌كه‌، تورهان گونای و پارێزه‌ر بوله‌نت ئوتكو. نووسه‌ران حیكمه‌ت چه‌تین كایا، ئایدن ئه‌نگین، گورای ئۆز و هاكان كارا. كاریكاتێریسته‌كان مووسا كارت و ئه‌ندامانی ئه‌نجوومه‌نی وه‌قفی جومهوریه‌ت مسته‌فا كه‌مال گونگۆر، ئۆنده‌ر چه‌لیك و بوله‌نت یه‌نه‌ر ده‌ستگیركران.
له‌م نێوه‌نده‌شدا له‌ چوارچێوه‌ی لێكۆڵینه‌وه‌كه‌دا بڕیاری ده‌ستگیركردن بۆ به‌ڕێوه‌به‌ری گشتیی بڵاوكردنه‌وه‌ی پێشووی رۆژنامه‌كه‌، جان دوندار ده‌ركرا كه‌ له‌ده‌ره‌وه‌ی وڵاته‌، ئۆرهان ئه‌رینچ-یش به‌هۆی ئەوەی کە کەسێکی بەساڵاچووە ته‌نها پشكنین له‌ ماڵه‌كه‌یدا ئه‌نجامدرا.