بۆڵو - AA
دیمەنە دڵڕفێنەکانی وەرزی پایزی ئەمساڵ خۆی لە ھەردوو پارتی سرووشتی گۆلجوک و پارکی میللی یەدیگۆللار-ی سەربە پارێزگای بۆڵوی تورکیا نیشاندا.
لە وەرزی زەردبوون و ھەڵوەڕینی گەڵاکان لە ھەردوو پارکی سرووشتی گۆلجوک و پارکی میللی یەدیگۆللار کە دەکەوێتە شاری بۆڵوی تورکیا، جارێکی دیکە دیمەنی جوانی سرووشتەکەی بووە جێی سەرنجی سەردانیکەرانی.
سەردانیکەران بەمەبەستی بەسەربردنی کاتێکی خۆش و دوورکەوتنەوە لە جەنجاڵی نێو شار روودەکەنە ئەم پارکانە کە بەشێکی زۆریان بە درەخت و گوڵوگوڵزار داپۆشراون.
گەشتیاران لە کاتی سەردانیکردنیان بۆ ئەو ناوچەیە، پیاسەیەک بەدەم چەمەکانی نێو پارکەکان دەکەن و خێوەت لە بەشی کامپینگی ئەو ناوچەیە هەڵدەدەن و فۆتۆی جوانی ناوچەکە دەگرن.
لە پاڵ ئەمەش پارکی میللی یەدیگۆللار بووەتە شوێنێکی گونجاو بە تایبەتی بۆ فۆتۆگرافەران و ھەودارانی جوانی سرووشت لە وەرزی پایزدا.
لەلایەکی دیکەش پارکی سرووشتی گۆلجوک کە ١٣ کیلۆمەتر لە ناوەندی شاری بۆڵو دوورە، جوانترین رەنگەکانی سرووشتی لەخۆگرتووە و بووەتە شوێنێکی ناوازە بۆ گەشتیارانی ناوخۆیی و بیانی.
سەرۆکی دەزگای خاوەن ھۆتێلەکانی گەشتیاری رۆژئاوای دەریای رەش، خالید ئارگول لە لێدوانێکیدا بۆ ئاژانسی ئانادۆڵو رایگەیاند کە شاری بۆڵو ناوەزەترین شوێنی تورکیایە و پێویستە گەشتیاران سەردانی پارکی میللی یەدیگۆللار بکەن.
ئارگول رایگەیاند کە بەھۆی بڵابوونەوەی ڤایرۆسی کۆرۆنای نوێ جموجۆڵی گەشتیاری کەمبووەتەوە، بەڵام ئێستا بە ھۆی دەستپێکردنی پشووی نیوەی ساڵ گەشتیاران دەستیان کردووە بە سەردانیکردنی ناوچەکە.
ئۆزگان و گولبین بوڵەت کە ھاوسەری یەکترن رایانگەیاند کە لە شاری ئەنقەرە بەمەبەستی بەسەربردنی رۆژانی پشوویان ھاتوونەتە پارکی میللی یەدیگۆللار و سەرسام بوون بە جوانی و رەنگا و رەنگی ناوچەکە.
