تورکیا .. بەرزی پلەی گەرما گەیشتە ٤٦ پلەی سیلیزی

دیاربەکر - AA

بەرزبوونەوەی پلەی گەرما لە ناوچەکانی باشووری رۆژھەڵاتی ئانادۆڵو لە تورکیا، کاریگەری نەرێنی خستووەتە سەر ژیانی رۆژانەی خەڵکی ناوچەکە.

بەپێی ئەو زانیاریانەی لە بەڕێوەبەرایەتی کەشوھەوای ناوچەی ١٥یەمین لە تورکیا وەرگیراوە ، ھەفتەی رابردوو پلەی گەرما لە خوار ٤٠ پلەی سیلیزی بووە ، بەڵام لەگەڵ ھاتنی جەژنی قوربان تەوژمێکی گەرمای بەرز باڵی بەسەر ناوچەکەدا کێشاوە و پلەی گەرما نزیکەی ٦ تا ٧ پلەی سیلیزی بەرز بووەتەوە.

ئەمڕۆ پلەی گەرما لە دیاربەکر و سێرت ٤٣ پلەی سیلیزی، لە ئورفا ٤٥.٥ ، لە شرناخ و جزیرێ ٤٦.٨ پلەی سیلیزی بووە.

لەبارەی کاریگەرییە نەرێنییەکانی پلەی گەرما لەسەر ھاووڵاتیان ، شارەزایان کەسانی بە تەمەن و منداڵانیان ئاگادارکردەوە لە خۆپاراستن لە بەرکەوتنی راستەوخۆی کەشوھەوای گەرم.

لەلایەکی دیکەش لە شارۆچکەی سووری مێژووی دیاربەکر، بەھۆی بەرزبوونەوەی پلەی گەرما منداڵان بە مەلەکردن لە نێو ئاوی سارد خۆیان فێنکردەوە.

ھاوکات لە شاری سێرتیش منداڵان بۆ کەمێک دوورکەوتنەوە لە بەرزی پلەکانی گەرما خۆیان ھەڵدایە نێو ئاوی سارد.