مێرکڵ: "بڕیارمانداوە ٣ ملیار یۆرۆ پێشکەش بە تورکیا بکەین"

بەرلین - AA

راوێژکاری ئەڵمانیا، ئەنگێلا مێرکڵ لە چوارچێوەی پێشکەشکردنی ھاوکاری بۆ ئاوارەکانی سووریا رایگەیاند کە بڕیاریانداوە بۆ دووەم جار بڕی ٣ ملیار یۆرۆ پێشکەش بە تورکیا بکەن.

مێرکڵ لە دوای لوتکەی کۆنسەی ئەورووپا کۆنگرەیەکی رۆژنامەوانی رێکخست و تێدا رایگەیاند کە پشتیوانی لە پڕۆژەکانی تورکیا بۆ ئاوارەکانی سووریا دەکەن و بۆ ئەم مەبەستەش بۆ دووەمین جار بڕی ٣ ملیار یۆرۆ پێشکەش بە تورکیا دەکەن.

مێرکڵ گوتیشی: "دەمانەوێ بە ھەموو شێوەیەک رێککەوتنی تورکیا و یەکێتی ئەورووپا لەبارەی پەناخوازان جێبەجێ بکەین. بڕیارماندا بۆ دووەم جار بڕی ٣ ملیار یۆرۆ پێشکەش بە تورکیا بکەین. تورکیا لەبارەی لەخۆگرتنی ئاوارەکان کاری بێ وێنە ئەنجام دەدات".

مێرکڵ ئاشکراشی کرد بە شێوەیەکی گشتی وڵاتانی یەکێتی ئەورووپا لەبارەی پرسی پەناخوازان رێککەوتوون. گوتیشی: پرسی پەناخوازان نەک تەنھا بۆ یەک وڵاتی ئەندام بەڵکو بۆ گشت یەکێتی ئەورووپا تاقیکردنەوەیەکی گرنگە".

راوێژکاری ئەڵمانیا ئاشکراشی کرد کە بەمەبەستی رێگری لە کۆچی نایاسایی وەبەرھێنانی زیاتر دەکەن و بۆ دروستکردنی سیستەمێکی ھاوبەشی پەناخوازانیش کاری زۆر ماوە ئەنجامی بدەن، بەڵام بە شێوەیەکی گشتی لەمبارەیەوە رێککەوتوون.