ھەڵەبجە.. ئاسایش دەستبەسەرداگرتنی ١،٥ملیۆن حەبی قەدەغەکراوی راگەیاند

ھەڵەبجە - AA
بەرپرسی بەشی راگەیاندن و پەیوەندیەکانی بەڕێوەبەرایەتی ئاسایشی شارەزوور، رائید ئاراس محەمەد تۆفیق لە لێدوانێکدا بۆ ئاژانسی ئەنادۆڵو وردەکاریەکانی دەستبەسەرداگرتنی ئەو حەبە قەدەغەکراوانەی رایگەیاند، ئەو گوتی: "لەچوارچێوەی ھەوڵی ھێزەکانمان بۆ بنەبڕکردنی دیاردە نەخوازراوەکان، لە شەوی ١٨ی ئەم مانگە دوای ئەوەی دوو ئۆتۆمبێلی جۆری تۆیۆتا لاندکرۆزەر بە ناو کەمینێکی ھێزەکانماندا تێدەپەڕن لە میانی وەستاندنیان بۆ پشکنین، ئۆتۆمبێلەکان نەوەستاون و تەقەشیان لە مەفرەزەی ھێزەکانمان کردووە، بەڵام ھێزەکانمان دوایان کەتوون و ئۆتۆمبێلەکانیان ناچار بە وەستان کردووە".
گوتیشی: "دوای پشکنینی ئۆتۆمبێلەکان دەرکەوتووە کە حەبی قەدەغەکراوی جۆری ترامادۆڵیان پێبووە، لە ٣٩ کارتۆندا کە دەکاتە نزیکەی یەک ملیۆن و ٥٦٠ ھەزار دەنک حەب کە ویستوویانە بەرەو دەرەوەی ھەرێم رەوانەی بکەن، کە ئەو حەبانە دواتر بۆ مەبەستی دروستکردنی ماددەی ھۆشبەر بەکاردەھێنرێن".
بەرپرسی بەشی راگەیاندن و پەیوەندیەکانی بەڕێوەبەرایەتی ئاسایشی شارەزوور سەبارەت بە دەستگیرکردنی تۆمەتبارانی دۆسیەکەش گوتی: "لەو ھەڵمەتەدا چوار تۆمەتبار بە بڕیاری بەڕێز دادوەری لێکۆڵینەوەی ئاسایشی شارەزوور و بە پێی ماددەی ١٤ی ماددە ھۆشبەرەکان دەستگیرکراون و دوو تۆمەتباری تری رووداوەکەش کە فەرمانی گرتنیان بۆ دەرچووە، ھەڵاتوون و لێکۆڵینەوەی زیاتریش بەردەوامە".
سەرەتای ئەمساڵیش لە دوو ھەڵمەتی جیاوازدا ئاسایشی شارەزوور دەستی گرتبوو بەسەر چوار ملیۆن دەنکە حەبی تری جۆری ترامادۆڵ و چوار کەسی تریش لەسەر ئەو دۆسیەیە دەستگیر کران و رووبەڕووی دادگا کرانەوە.