ڤیزا لەنێوان تورکیا و قەتەڕ هەڵگیرا

ڤیزای نێوان هەردوو وڵاتی تورکیا و قەتەڕ هەڵگیرا.

سەرکۆماری تورکیا رەجەب تەیب ئەردۆغان رایگەیاند ڤیزای نێوان وڵاتەکەی و قەتەر هەڵگیراوە و مژدەی دایە تورکیایی و قەتەرییەکان بەوەی بێ وەرگرتنی ڤیزا دەتوانن گەشت بکەن.

ئەردۆغان ئەمەی بە هەنگاوێکی باش وەسف کرد و سوپاسی ئەمیری قەتەر شێخ تەمیم بن حەمەد ئالی سانیی کرد.

ئەردۆغان لە دۆحەی پایتەختی قەتەر چەند روونکردنەوەیەکی لەبارەی سەردانەکەی بۆ ئەو وڵاتە کرد و ئاماژەی بە پێکهێنانی کۆمیتەی هاوبەشی ستراتیژیی نێوان تورکیا و قەتەر و واژووکردنی 15 خاڵی هاوبەش کرد. ​

سەرکۆماری تورکیا بەمجۆرە بەردەوامبوو لەسەر گوتەکانی: "تەواوی ئەو خاڵە هاوبەشانەی واژوویان لەسەر کرا گرنگ و ئەرێنی بوون. دەتوانم لێرەوە باسی خاڵی 16ەم بکەم کە هەنگاوێکی گرنگە. ئەویش هەڵگیرانی ڤیزایە لە نێوان تورکیا و قەتەر. ئیتر هاونیشتمانیانمان و خەڵکی قەتەر بە بێ ڤیزا دەتوانن گەشتی نێوان تورکیا و قەتەر ئەنجام بدەن. لێرەوە بە پێویستی دەزانم سوپاسی برای ئازیزم ئەمیری قەتەر شێخ تەمیم بن حەمەد ئالی سانی بکەم. لە کاتێکی دیاریکراودا توانیمان چەند هەنگاوێکی گرنگ بنێین و پەیوەندییەکانمان لەگەڵ قەتەر تۆکمەتر بکەین".

جێی باسە دوای تەواوبوونی کۆبوونەوەی کۆمیتەی هاوبەشی ستراتیژیی نێوان تورکیا و قەتەر، شێخ تەمیم و ئەردۆغان کۆنگرەیەکی رۆژنامەوانییان ئەنجامدا.

ئەردۆغان خۆشحاڵیی خۆی دەربڕی لە بوونی چەندین خاڵی بەهێز لە نێوان تورکیا و قەتەر کە خزمەت بە پەیوەندییەکانیان دەکەن و بە گرنگی دانا لەمەودا بەردەوام بن لە هەڵوێستی هاوبەشانەی دژ بە تیرۆر و لەمەڕ سووریا و فەڵەستیندا بە هەمان شێوازی ئێستا هەڵوێست بنوێنن.

سەرکۆماری تورکیا پێشیوایە کە جیهانی ئیسلامی لە بارێکی خراپدایە و گوتی لە زۆربەی وڵاتانی ئیسلامیدا کێشە و ئاژاوە هەیە و ئێمە وەک دوو وڵاتی ئارام و خاوەن ئاسایشی باش پێویستە پاڵپشتێکی باش بین بۆ ئەو وڵاتانە.