پارێزگاری سلێمانی قەدەغەی هاتوچۆی بۆ ئۆتۆمبێل لەنێو بازاڕی شارەکەدا راگەیاند

لیژنەی باڵای ئۆپەراسیۆنەکانی پارێزگای سلێمانی بۆ بەرەنگاربوونەوەی ڤایرۆسی کۆرۆنای نوێ دوای ڕاوێژو ڕاگۆڕینەوە لەگەڵ وەزیری ناوخۆی هەرێمی کوردستاندا تایبەت بە رێکارەکانی بەرەنگاربوونەوەی کۆرۆنا، بڕیاریدا و لەوبارەیەوە گشتاندنێکی نوێ بڵاوکرایەوە کە خۆی لە چوار بڕیاری نوێدا دەبینێتەوە.

بڕیارەکان بەم شێوەیەی خوارەوەیە:

١- جەختکردنەوە لەسەر جێبەجێکردن و بەدواداچوونی تەواوی ئەو بڕیارانەی لە کۆبوونەوەی رۆژی ٢٠ی حوزەیرانی ٢٠٢٠ لیژنەی باڵای ئۆپەراسیۆنەکانی پارێزگای سلێمانی بۆ بەرەنگاربوونەوەی کۆرۆنادا دراون و بە نووسراوی ژمارە ١٢٥ لە ٢٠ی حوزەیرانی ٢٠٢٠ پارێزگای سلێمانی/ نووسینگەی تایبەتدا، گشتاندنیان بۆ هەموو یەکە کارگێڕیی و فەرمانگا پەیوەندیدارەکان پێ کراوە.

٢- لە ڕۆژی ٢٥ی حوزەیرانی ٢٠٢٠وە، هاتوچۆی ئۆتۆمبێل لە سەنتەری (ناوبازاڕی) شاری سلێمانیدا رادەگیرێت و هاووڵاتییان بەپێی رێنماییە خۆپارێزیی و تەندروستییەکان تەنها بە پێ دەتوانن هاتوچۆی بازاڕ بکەن.

٣- دابەشکردنی مووچە لە رۆژانی ئایندەدا دەستپێدەکات و لەکاتی پێویستدا فەرمانگە و خەزێنەو بانکەکانی سەر بە وەزارەتی دارایی دەوامی خۆیان دەکەن بەپێی رێکار و رێنماییە تەندروستییەکان و، فەرمانگەکان بەپێی لیستی مووچە بەهەمان رێکارو رێنمایی تەندروستیی لەو رۆژانەی بۆیان دیاریدەکرێت، مووچە دابەش دەکەن.

٤- پێویستە هەموو یەکە کارگێڕییەکانی سنووری پارێزگای سلێمانی هەمان ئەو بڕیارو رێکارو رێنماییانە جێبەجێ بکەن، کە لەم نووسراوە و نووسراوی ژمارە (١٢٥)ی رۆژی (٢٠/ ٦/ ٢٠٢٠)ی پارێزگای سلێمانیدا دیاریکراون و بەپێی تایبەتمەندیی سنوورە کارگێڕییەکانیشیان دەسەڵاتی تەواویان هەیە رێکاری تر بۆ باشتر بەرەنگاربوونەوەی کۆرۆنا بگرنەبەر.