Wezîrê Karên Navxweyî Alî Yerlîkaya ragihand ku di operasyonên ji hêla cendirmeyan va hatin kirin da li Hekariyê 378 kîlo û li Agiriyê jî 773 lître hişbira avkî hat bidestxistin û şikbarek jî hat binçavkirin.

Wezîr Yerlîkaya di daxuyaniya ku li ser hesabê xwe yê NSosyalê parve kir da got bi serkêşiya Serdozgeriyên Komarê yên Yuksekova û Taşliçayê û Serokatiya Daîreya Têkoşîna Dijî Sûcên Narkotîk a Fermandariya Giştî ya Cendirmeyan li dijî madeyên hişbirê li Hekarî û Agiriyê operasyon hatin kirin.

Yerlîkaya got piştî xebatên îstîxbaratê yên Fermandariyên Cendirmeyan ên Bajêr ên Hekarî û Agiriyê û bi piştgiriya "Tîmên Êrîşê" operasyon hatin kirin.

Wezîr Yerlîkaya der barê operasyonan da agahî da û wiha got:

"Li Hekarî û Agiriyê di operasyonên ku ji aliyê cendirmeyên me va li dijî madeyên hişbirê hatin kirin da, me li Hekariyê 345 kîlogram skunk û 33 kîlogram metamfetamîn û li Agiriyê jî 773 lître metamfetamîna avkî bi dest xist. Me rê li ber girt ku ew li însanan bê belavkirin û zirarê bide tenduristiya gel. Kesek hat qefaltin û hat binçavkirin. Hişbir dijminê herî mezin ê mirovahiyê ye. Em ê li ser navê welatê me û mirovahiyê li dijî bazirganên jehrê yên ku curetê dikin ku vê yekê bikin, têkoşîna xwe bidomînin. Ez kesên ku keda wan heye pîroz dikim."