RIDVAN KORKULUTAŞ - Pez û dewarên ku ji bo qurbanê li çêre û zozanên Bîngolê tên bixwedîkirin ber bi rojava va tên şandin.

136 hezar û 380 pez û 12 hezar û 22 dewarên ku ji par va li çêre û zozanên berhemdar ên Bîngolê goşt digirin, ber bi çar aliyên Tirkiyeyê va hatin şandin.

Beriya Cejna Qurbanê di sewqiyata pez û dewaran da tevgereke mezin destpê kiriye.

Beriya sewqiyata ku bi giranî ber bi parêzgehên weke Stenbol, Kocaelî û Bursa û herêmên weke Trakyayê tê kirin, pez û dewar ji beriya mehekê va dikevin karantînayê.

Wezareta Çandinî û Daristana nimûneyên xwîna qurbaniyan yek bi yek digirin û laboratuwaran test dikin, encamên wan li platformên li hewşa Rêveberiya Çandinî û Daristanan a Parêzgehê tên analîzkirin.

Piştî guncavdîtina encaman destûra sewqa qurbaniyan tê dayin.

- Piştî kontrola tendirustiyê ajel ji bo firotinê amade dibin

Rêveberê Çandinî û Daristanan ê Parêzgehê Burhan Bahadir ji nûçegihanê AAyê ra anî ziman ku pez û dewarên ku ajeldar di pêvajoyeke dirêj da kedeke mezin didine wan, piştî kontrola tendirustiyê ji bo firotinê amade dibin.

Bahadir destnîşan kir ku welatî dikarin ji sepanên weke e-Devletê û "Tarim Cebimde" (Çandinî di Berîka Min da) ya Wezareta Çandinî û Daristanan her cûre agahîyên li ser ajelên qurbanê yên ku ew ê bikirin bistînin.

- "Hêviya me ew e ku pez û dewarên qurbanê yên her kesî bên firotin"

Zeki Bilen li gundê Gozeler ê ser bi navendê ajaldariyê dike, diyar kir ku ew nêzîkî 16 salan e ku ajelên qurbanê xwedî dike.

Bilen got, "Me got Bîsmillah û me dest bi kar kir. Înşelle heke nesîb be, emê ber bi Stenbolê bi rêkevin. Emê ajelan bibin Trakyayê, hêla Ewropayê ya Stenbolê. Ez bi 2 TIRan 50 serî dewarî dibim. Hêviya me ew e ku pez û dewarên qurbanê yên her kesî bên firotin. Hêvidar im hemî alî jê qezanc bikin."