Rojê xewa ji 7 saetî kêmtir rîska krîza dilî zêde dike

 Doç. Dr. Serkan Kahramanê Pisporê Kardiyolojiyê yê Nexweşxaneya Perwerde û Lêkolînê ya Cerahiya Sing Dil û Demaran a Mehmet Akîf Ersoy a Zanîngeha Zanistên Tenduristî (SBU) destnîşan kir, di wan kesan da yên ku rojê ji 7 saetan kêmtir radizên, ji ber xitimîna dil û demaran rîska krîza dilî bêtir tê dîtin û her wiha têrênekirina dil zêde dibe.

Kahraman ji peyamnêrê AAyê ra diyar kir ku nexweşiyên dil û demaran li hemû dinyayê ji sedemên herî sereke yên mirinan in.

Kahraman destnîşan kir ku ji ber wê çendê, nexweşiyên dil û demaran ne bi tenê li Tirkiyeyê li hemû dinyayê ji bo tenduristiya civakî pirsgirêkeke cidî ye û bi demê ra sedemên wekî extiyarî, nexweşiya şekirê, tansiyonê bilind, kolesterola bilind, cixarekêşan û obezîte, nexweşiyên dil û demaran zêdetir dikin.

Kahraman her wiha bal kişand ku pergala xewê ji hêla tenduristiya dilî pir giring e û ragihand ku li dinyayê ji sê kesan bi kesekî ra bêpergaliya xewê heye.

Doç. Dr. Kahraman her wiha diyar kir ku xewa bêkalîte, rîska krîza dilî û bêpergaliya rîtma dilî zêde dike û wiha dewam kir, "Ku em kêm razên, pêvajoya îltihabî ya em jê ra dibêjin înflamasyon dest pê dike. Ev jî xitimîna dil û her wiha demaran zêde dike. Di wan kesan da yên ku rojê ji 7 saetan kêmtir radizên, ji ber xitimîna dil û demaran rîska krîza dilî bêtir tê dîtin û her wiha têrênekirina dil zêde dibe û bêpergaliya rîtma dilî bêtir xwe nîşan dide."

Kahraman bal kişand ku bi şev razana dereng, kalîteya xewê têk dibe û nexasim di xewa piştî saet 23.00 û 24.00an da kalîte têk diçe.

Kahraman her wiha ji bo şertên xeweke baş jî wiha axivî:

"Ji bo xeweke baş divê mirov di nava rojê da xwe ji bo vê amade bike. Bi taybetî bi roj divê mirov ji xurekên pir bi rûn û xwê dûr bisekine. Mirov divê ji kartêkerên wekî cixare, alkol û kafeînê dûr bisekine. Heger em nava rojê bi têra xwe egzersîzên fîzîkî bikin, ev jî dê bibe wesîle ku em bi şev baş razên."