Serokê Meclisê Numan Kurtulmuş wiha got: "Bila tu kes bi rêya rêxistinên terorê hewl nede ku Sûriyeyê jehrî bike. Sûriye ya Sûriyeyîyan e û Sûriye bi biryar e ku bi hev ra dahatûyeke hevpar ava bike."

Serokê Meclisê Kurtulmuş li Meclisê bi Seroka Meclisa Nûneran a Îspanyayê Francîna Armengol Socîasa ku ji bo serdanên fermî li Enqereyê ye, hevdîtinek pêk anî.

Kurtulmuş û Armengol piştî hevdîtinê civîneke çapemeniyê ya hevpar li dar xistin.

Kurtulmuş behsa rojeva erênî ya di navbera herdu welatan da kir û got têkiliyên dualî yên bi aheng ên di navbera Serokomar Recep Tayyîp Erdogan û Serokwezîrê Îspanyayê Pedro Sanchez da dewam dikin.

Kurtulmuş anî ziman ku helwesta hikûmeta Îspanyayê û gelê Îspanyayê ya li hemberî komkujiya li Xezeyê ya tevî agirbesta ku hatiye ragihandin dewam dike, hêjayî pesindayînê ye.

Kurtulmuş der barê pêvajoya Tirkiyeya Bêteror û xebatên Komîsyona Piştevaniya Neteweyî, Biratî û Demokrasiyê da jî wiha got: "Em di xebatên komîsyonê da gihîştin qonaxa dawî. Hevalên me ji bo ku di demeke zûtir da biqedînin bi dil û can hewl didin. Di rojên pêş da rapor wê bê amadekirin û li endamên komîsyonê bê belavkirin."

Kurtulmuş ji bo hewldanên rêxistinên terorê yên li Sûriyeyê jî wiha axivî: "Divê hemû pêkhateyên cuda yên li Sûriyeyê, bi cudahîyên xwe yên etnîkî, mezhebî û olî va bibin beşek ji rêveberiya nû ya Sûriyeyê û divê pêşiya pêvajoyeke demokratîk were vekirin ku her kes bikaribe beşdarî rêvebiriya Sûriyeyê bibe. Niha dem hatiye ku hemû pêkhateyên çekdar û rêxistinên çekdar ji qada Sûriyeyê vekişin. Navê wê çi dibe bila bibe, PYD/YPG rêxistineke terorê ye. DEAŞ rêxistineke din a terorê ye. Her kî hebe ku bi awayekî nemeşrû divê ji qada Sûriyeyê vekişe. Divê Ereb, Kurd, Tirkmen, Sunî, Êzidî, Nuseyrî û nemisilman ên Sûriyeyê hemû di bin yek alayê da dest bi jiyana bi hev ra ya di aştiyê da bikin. Bes e, piştî 60 sal dîktatorî û 13 sal jî şerê navxweyî divê tu kes bi rêya rêxistinên terorê hewl nede ku Sûriyeyê jehrî bike. Sûriye ya Sûriyeyîyan e û Sûriye bi biryar e ku bi hev ra dahatûyeke hevpar ava bike.