Alîkarê Serokomar Cevdet Yilmaz: "Bi polîtîkayên ku tên şopandin û destkeftiyên ku wê bên bidestxistin va aboriya Tirkiyeyê wê di dawiya heyama bernameyê da (OVP) bigîhîje rewşeke xurttir."

Alîkarê Serokomar Yilmaz li Kuliyeya Serokomariyê di Lansmana Bernameya Demnavîn a 2026-2028an da axivî.

Yilmaz anî ziman ku bernameya aboriyê ya bi îradeya Serokomar Recep Tayyîp Erdogan hat destpêkirin bi serkeftî tê meşandin û wiha axivî: "Bernameya me ya aboriyê ya ku me bi îradeya siyasî ya xurt a Serokomarê me pêşkêş kir, bi serkeftî tê bicîanîn û em encamên wê yên berbiçav bi hev ra dibînin."

Yilmaz der barê Bernameya Demnavîn a 2026-2028an da wiha got: "Armanca me ew e ku di dawiya bernameyê da enflasyon bigîhîje yek reqemî. Bi polîtîkayên ku tên şopandin û destkeftiyên ku wê bên bidestxistin va aboriya Tirkiyeyê wê di dawiya heyama bernameyê da bigîhîje rewşeke xurttir."

Der barê rêjeya kêmasiya hesabê carî da jî Yilmaz wiha axivî: "Tê hêvîkirin ku rêjeya kêmasiya hesabê carî ya li hemberî dahata neteweyî di 2026 û 2027an da dakeve asta ji sedî 1,3 û 1,2yan û ji sala 2028an pê va jî dakeve ji sedî 1î."

Yilmaz wiha dewam kir: "Rêjeya kêmasiya budceyê ya li hemberî dahata neteweyî tê pêşbînîkirin di 2025an da bibe ji sedî 3,6, di 2026an da ji sedî 3,5 û di dawiya vê heyamê da jî ji sedî 3 kêmtir bibe. Heta dawiya sala 2028an em ê sazûmaniyeke aboriyê ya ku aramiya makroaboriyê ya mayînde misoger dike û mezinbûna domdar saz dike, ava bikin."

Yilmaz destnîşan kir ku cara yekem dahata neteweyî wê nêzîkî 1.9 trîlyon dolarî bibe û wiha axivî: "Cara yekem dahata me ya neteweyî wê nêzîkî 1.9 trîlyon dolarî bibe û dahata serê mirovî jî wê bigihîje 21 hezar dolarî. Dahata me ya turîzmê wê bigihîje 75 milyar dolarî, bêkarî wê dakeve binê ji sedî 8an û îstiqrara bihayan jî wê bi enflasyona yek reqemî va bi awayekî mayînde pêk were."