Li Wan, Hekarî, Bidlîs û Mûşê rêyên 343 tax û gundan ji ber berf û bagerê hatin girtin.

Li gorî daxuyaniya Şaredariya Bajarê Mezin a Wanê, li bajêr rêyên 156 tax û gundan ji ber berf û bagerê hatin girtin.

Ekîbên Serokatiya Daîreya Çêkirin, Temîrkirin û Kontrolkirina Rêyan ji bo vekirina rêyên girtî dixebitin.

Ekîbên agirkujê jî şembelûkên nêzîkî mêtroyekê dirêj yên li ser derî û banê dibistanan şikandin ku ew ji bo xwendekar û mamosteyan nebin talûke.

Li navçeya Erdîşê ya ku li hin deveran qalindahiya berfê gihîşt mêtroyekê, ekîbên Şaredariya Bajarê Mezin a Wanê ji bo ku di hatin û çûyînê da astengî çênebe, li ser rêyên sereke, kuçe û rêyên taxên gundan paqijkirina berfê didomînin.

Berfa ku ji hêla makîneyên kar va hat berhevkirin, li kamyonan hat barkirin û ji bajêr hat derxistin.

- Hekarî

Li Hekariya ku li deverên bilind qalindahiya berfê gihîşt 2 mêtroyan, welatî paqijkirina berfê ya li ser banên mal û kargehên xwe didomînin.

Li bajarê ku xanî û tewleyên yekqatî bi berfê nixumîn, ekîbên şaredariyê û rêbejayê jî ji bo paqijkirina berfê dixebitin.

Li gorî agahiya Îdareya Taybet a Bajêr ji ber berfa zêde ya pêr, rêyên 172 gund û mezrayan hatin girtin.

Ekîban ji van rêyan jê 83 vekirin û ji bo vekirina 89 rêyên mayî jî xebatên xwe didomînin.

Li navçeya Derecîkê jî ji ber berfa zêde, li ser banên xanîyan berf kom bû.

- Bidlîs

Li navenda bajêr û navçeyan ji ber berfa zêde û bagerê rêyên 87 gundan hatin girtin.

Ekîbên Îdareya Taybet a Bajêr ji bo vekirina rêyan dixebitin.

- Mûş

Li Mûşê jî piştî berfa ku zêde barî ekîbên Îdareya Taybet a Bajêr ji bo ku rêyên gundan vekirî bimînin, dixebitin.

Li bajêr rêyên 368 gundan ji ber berfê hatin girtin, ji van 357 hatin vekirin û ji bo vekirina 11 rêyan jî xebat dewam dikin.

Rûyê Çemê Reş û ku ji Deşta Mûşê ra derbas dibe jî, ji ber sir û seqemê qeşa girt.

Li ser banê xaniyan şembelûkên ku bi mêtroyan dirêj in çêbûn, dar û beran qiravî girt û paceyên mal, kargeh û wesayîtan jî qeşa kişand.

Welatiyan betanî û pîne avêtin ser wesayîtên xwe ku ji sermayê biparêzin.

Ekîbên Şaredariya Mûşê berfa li navenda bajêr bi kamyonan birin dervayî bajêr.