Li Wan, Bidlîs, Mûş û Hekariyê rêyên 225 tax û gundan ji ber berfê û hewaya nebaş hatin girtin.

Li gorî daxuyaniya Şaredariya Bajarê Mezin a Wanê, berf û bagerê rêyên 127 cî û waran girt.

Ekîbên Serokatiya Daîreya Çêkirin, Temîrkirin û Kontrolkirina Rêyan ji bo vekirina rêyên girtî dixebitin.

- Bidlîs

Li Bidlîsê ji ber berfê rêyên 22 gundan ji hatin û çûyînê ra hatin girtin.

Midûrê Xizmetên Rê û Veguhastinê yê Rêvebiriya Taybet a Bajêr Umît Kurtkan diyar kir ku berfê rêyên 111 gundan girtiye ku ji wan 89 hatin vekirin.

Kurtkan daxuyand ji bo ku welatî tengasiyê nekşînin ew ê rêyên 22 gundan jî vekin.

Ekîbên rêbeja û şaredariyê berfê paqij dikin û xoyê direşînin.

Li navçeya Tetwanê jî ekîb berfa li navendê bi kamyonan li bar dikin û dibin dervayî bajêr.

- Mûş

Li Mûşê piştî barîna berfê ya zêde, ekîbên Rêveberiya Taybet a Bajêr ji bo vekirina rêyên gundan xebatên xwe didomînin.

Ji 142 rêyên gundan ên ku ji ber şert û mercên hewayê yên nebaş hatine girtin, jê 109 hatin vekirin, li ser 33 rêyên mayî jî xebat dewam dikin.

Sekreterê Giştî yê Rêveberiya Taybet a Bajêr Şeyhmus Yentur diyar kir ku qalindahiya berfê li navenda bajêr ji 110 santîmêtroyan û li cihên bilind jî ji mêtro û nîvekê derbas bûye.

Yentur daxuyand ku xebatên paqijkirina berfê bi 110 xebatkar û 68 makîneyên kar va têne kirin, ekîb bi şev û roj dixebitin da ku di hatin û çûyînê da tengasî çênebe.

- Hekarî

Li gorî agahiyên Rêveberiya Taybet a Bajêr, ji ber berfa zêde ya rojek berê li Hekariyê rêyên 353 tax û gundan hatin girtin, jê 310 bi saya hewldana ekîban hatin vekirin.

Ekîb ji bo vekirina 43 rêyên girtî yên mayî xebatên xwe didomînin.

Ekîbên rêbeja û şaredariyê berfê paqij dikin.

Alîkarê Walî û Sekreterê Giştî yê Rêveberiya Taybet a Bajêr Cuneyt Zor çû serdana şantiyeya Mala Lênêrînê ya Gundê Akçaliyê.

Zor bi rayedarên ku li herêmê xebatên paqijkirina berfê dikin ra civiya û ji bo hewildanên wan spasiya xebatkaran kir.

Zor paşê xebatên paqijkirina berfê yên li gundê Çaltikuru û koma rêyên gundan temaşe kir û got ji bo welatî di hatin û çûyînê da zehmetiyan nekişînin ev xebat gelekî girîng in.