Li Gola Çildirê ya ku dikeve ser sînorê Qers-Erdexanê û bi tesîra sir û seqemê beşek jê qerimiye, xizekvanan dest bi fealiyetên xwe kirin û li ser cemedê kêfa safariyê bi turîstan didin hîskirin.

Beşeke rûberê Gola Çildirê ya ku dikeve ser sînorê Qers-Erdexanê û her wiha piştî Gola Wanê, duyemîn gola herî mezin a Herêma Rojhilatê Anadoluyê ye, bi tesîra sermayê qerimî. Piştî barîna berfê jî tebeqeya cemedê dîmeneke sipehî derxist holê.

Bi qerimîna golê ra stûriya cemedê gihîşt bi qasî 15 santîmetreyî û kesên derketin ser cemedê, wextekî xweş borandin.

Turîstên xwemalî û biyanî yên ku ziyaretvanên ewil ên sezonê ne, kêfxweşiya xwe anîn ziman ku îsal sezonê zû dest pê kir û ew li xizekan siwar bûn.

Li ser cemeda golê hin turîstan govend gerandin û hinekan jî dans kir û bi vî awayî kêf kirin.

Davut Taşdemirê ku li ser Gola Çildirê xizekvaniya hespan dike ji peyamnêrê AAyê ra diyar kir ku li Gola Çidirê ya ku duyemîn gola herî mezin a Herêma Rojhilatê Anadoluyê ye, tûrên xizekên hespan dest pê kirin.

Taşdemir wiha axivî, "Em bi hespan derketin ser golê û me guzergeha xizekan kifş kir, pirsgirêk tuneye, me mişteriyên xwe gerandin. Sezon vebû, em li benda mişteriyên xwe ne. Li vir em 3-4 mehan xizmetê didin."

Ecrîn Yuksela ji Stenbolê hatiye jî diyar kir ku wê li ser cemedê dans kir û kêf kir.

Burak Necmi Yukselê ji Duzceyê hatiye jî diyar kir ku wan ji zû da tetîla Qersê plan kiribû û wiha got, "Qerimîna Gola Çildirê bû surprîz, her tişt pir xweş e, ez kelecanî me."